Бэҕэһээҥҥи ыар сүтүктээх быһылаан кэннэ Дьокуускай куоракка суукка устата үлэлиир ситуационнай киин арылынна. Манна биир кэлим диспетчерскэй сулууспаҕа бэйдиэ сылдьар ыттар ханна баалларын тыллыахха сөп. Нүөмэрэ — 44-46-54 и 44-42-29.
Ону кытта Whatsapp-ка +7(914) 261-06-98 нүөмэргэ чат-бот үлэлиир. Ватсапка ыттар баар аадырыстарын, хаартыска, видео ыытыахха сөп.
Онтон бүгүҥҥү күнтэн, ахсынньы 30-тан, бэйдиэ ыттары тутууга 15 биригээдэ үлэлии сылдьар. Бу туһунан куорат дьаһалтатын пресс-сулууспата иһитиннэрэр.
«Баһылык Евгений Григорьев Комсомольскай болуосссакка биригээдэлэри кытта мунньахтаата. 15 биригээдэ 30 киһилээх. Хас биирдии биригээдэҕэ кинологтар уонна үөрэхтээх дьон баар», — диэн иһитиннэриигэ этиллэр.
Ону таһынан управаларга мобильнай бөлөхтөр үлэлииллэр, кинилэр ыттары көрдөхтөрүнэ, биллэрэн иһиэхтэрэ. Ахсынньы 30 күнүгэр сарсыарда мэрия 170 тахса үлэһитэ, экстреннэй сулууспалар, 47 массыына үлэлиир. Онно эбии ИДьМ кинологическай сулууспата, ЫБММ быыһыыр сулууспата баар.