Олунньу 27 күнүгэр Дьокуускай куоратын 17-с нүөмэрдээх орто оскуолатыгар үгэс буолбут Өрөспүүбүлүкэтээҕи «Көтөллөр көмүс дорҕооннор-2026» хоһоон ааҕыытын күрэҕэ буолан ааста. Курэх 2019 сылтан сылын ахсын үбүлүөйдээх суруйааччылар хоһооннорун үйэтитээри ыытыллар. Быйыл 1-9 кылааска диэри оҕолору түмэн, уопсайа 76 үөрэннээччини, онтон 47 алын кылаас, 29 орто кылаас оҕолорун сөбүлээн талбыт хоһооннорун ааҕалларын иһиттибит. Быйылгы күрэх балаһыанньатынан үбүлүөйдээх суруйааччылар айымньыларын таһынан улуу суруйааччыбытыгар А.Е.Кулаковскайга аналлаах туспа салаа эмиэ киирбитэ.
Оҕо дьулуурдаах, тулуурдаах буоларыгар, өйүн-санаатын сайыннарарыгар, кэрэни көрө үөрэнэригэр улахан суолталаах күрэх буоларын оскуолабыт бибилэтиэкэрэ Пелагея Сивцева бэлиэтээн эттэ:
«Көтөллөр көмүс дорҕооннор» диэн үбүлүөйдээх суруйааччылар айымньыларынан хоһоон ааҕыы күрэҕэ 2019 сыллаахтан саҕаламмыта. Кэскил оҕо бэчээтин өйөөһүнүнэн биир ситимнээх сүбэлэҥ түһэриллибитэ. Ол чэрчитинэн номнуо ахсыс сылбытын күрэхпитин ситиһиилээхтик ыыттыбыт. Бу саамай ордук кыра кылаастарга күүтүүлээх тэрээһиммит буолар. Ону таһынан, оҕолор идэлэрин сөпкө талалларыгар эмиэ көмөлөһөр.
Галина Кардашевская Дьокуускай куоратын 17№ орто оскуолатын 2022 с. бүтэрэн тахсааччы:
Аан бастакы күрэх тэриллиэҕиттэн, оскуоланы бүтэриэхпэр диэри солбуллубат кыттааччы этим. Артыыс үөрэҕэр киирбитим биир төрүөтэ «Көтөллөр көмүс дорҕооннор» куонкурус буолар диэтэхпинэ сыыспаппын. Биһиги төрөөбүт тылбыт үөрдэр-көтүтэр, айар-тутар аартыгы арыйар.
Сергей Кузнецов Дьокуускай куоратын 17№ орто оскуолатын 2021 с. бүтэрэн тахсааччы, оскуола кэмигэр сылын ахсын күрэххэ кыттарын туһунан, тылбыт суолтатын туһунан кэпсээтэ:
«Тыл эһиннэҕинэ-норуот эстэр» диэн мээнэҕэ эппэттэр. Ол иһин биһиги, эдэр көлүөнэ оҕолоро, төрөөбүт тылбытын өрө тута сылдьар тустаахпыт, күннээҕи олоххо сахалыы саҥаран, кэпсэтэн, тылбытын сайыннарыахпытын наада.
Ираида Додохова 9 кылаас үөрэнээччитэ, күрэх кыттыылааҕа:
Мин бу күрэххэ бастакы кылаастан ситиһиилээхтик кыттабын. Кэскил оҕо бэчээтин кыһатын олус сөбүлүүбүн, тоҕо диэтэр, маннык күрэхтэр оҕону сайыннараллар, хоһоон ааҕыта бэйэтэ киһи өйүн, толкуйун хойуннарар. Бары кыттааччыларга ситиһиини баҕарабын!
Оскуолабыт иитэр үлэҕэ дириэктэри солбуйааччыта Оксана Борисова, эдкор Валерия Кусатованы кытары тэрээһин туһунан санаатын үүллэһиннэ:
«Көтөллөр көмүс дорҕооннор» диэн өрөспүүбүлүкэтээҕи таһымнаах күрэх буола турар. Нууччалыы тылбааһынан эмиэ «Живое слово родной поэзии» диэн, нуучча кылааһын оҕолоро кыттар кыахтаахтар . Сылтан сыл аайы сүүстэн тахса оҕо кыттар буоллахтарына, төһөлөөх элбэх оҕо аҕыс сыл устата кыттыбыта буолуой. Оҕо эрэ буолбакка дьиэ кэргэн бүтүннүү кыттар буоллаҕа. Төрөөбүт тылы билэргэ, үөрэтэргэ саамай табыгастаах күрэх дии саныыбын
— Оксана Ивановна, бу бырайыакка өссө тугу уларытыа этигиний?
— Сыл аайы балаһыанньа быһыытынан оҕо ахсаана хааччахтанар. Оскуолабыт киэҥэ буоллар, өссө элбэх оҕо кыттыа этэ. Начальнай туспа, биир тэҥ ҥэ улахан кылаас оҕолор ааҕыылара бара туруо этэ
— Хоһоон ааҕар оҕолорго, бэлэмниир учууталга, төрөппүккэ тугу сүбэлиэ этигитий?
— Бу күрэххэ олох эрдэттэн бэлэмнэнэн ааҕалларыгар. Кыттааччылар ахсааннара элбии турдун, күрэхпит сыл ахсын таһыма үрдээн истин.
«Көтөллөр көмүс дорҕооннор» хоһоон күрэҕэ төрөөбүт тылы сайыннарар уонна оҕолорго саҥа аартыктары арыйар. Ону урут бүтэрбит оҕолор туоһулаан эттилэр. Кыттааччыларга, кыайыылаахтарга өссө истиҥ эҕэрдэбитин тиэрдэбит.
Арина КОЛОДЕЗНИКОВА, Ангелина ПАВЛОВА,
интервьюну ылла Валерия КУСАТОВА,
«Сайдын» медиа бөлөх эдкордара