Быйыл Саха сирин биир бөдөҥ судаарыстыбаннай, общественнай диэйэтэлэ, саха дьоно ытыктыыр, сүгүрүйэр киһитэ, биир дойдулаахпыт Винокуров Илья Егорович төрөөбүтэ 130 сааһын бэлиэтээтибит. Кулун тутар 19 күнүттэн саҕалаан кини үрдүк аатыгар сүгүрүйэн, үбүлүөйдээх сылыгар анаммыт киэҥ бэлиэ тэрээһиннэр саҕаланнылар.
Биһиги, Дьокуускай куоратын 17 нүөмэрдээх орто оскуолатын 9 кылааһын үөрэнээччилэрэ, чулуу киһи туһунан дьон кэпсиириттэн истибиппит диэн кини саамай ураты майгыта дьоҥҥо болҕомтолоох сыһыана буолар эбит. Бэйэтэ улахан салайар үлэһит буолан баран, кимиэхэ баҕарар көмөлөһөр, дьону өйдүүр-өйүүр үтүө киһи буоларын элбэх киһи өйдөөн хаалбыт. Бэйэбит кини туһунан өссө эбии матырыйааллары көрөн, ааҕан, дириҥник үөрэтэргэ санаммыппыт.
Винокуров Илья Егорович 1896 сыл тохсүнньу 1 (эргэ истиилинэн 1895 сыл ахсынньы 20) күнүгэр Дьокуускай уокуругун Нам улууһун Куһаҕан Ыал (билиҥҥи Ленскэй) нэһилиэгэр төрөөбүт. Илья тоҕус саастааҕар нэһилиэк этиитинэн биир кылаастаах туора урдустарга аналлаах училищеҕа үөрэнэ киирбитэ. Тулаайах быһыытынан мөссүйүөҥҥэ олорбута, туйгуннук үөрэммитэ. Кинини кытта кэлин бассабыык буолбут Максим Аммосов, Степан Д.Трапезников, С.К. Сивцев үөрэммиттэрэ. Оскуолатын 1908 сыллаахха 12 саастааҕар бүтэрбитэ, үөрэҕин салгыыр үбэ суох буолан ийэтин кытта Жирковтарга олорбута. Ийэтэ уолу Павел Иванович Кравченко диэн политсыылынайга үөрэттэрэ биэрэ сылдьыбыта. Ол эрээри икки эрэ ыйтан ордук үөрэммитин кэннэ олорор ыалларын ийэлэрэ өлөн хаалбыта, онон үөрэҕэ тохтообута. Нөҥүө сылыгар (1912) Илья ийэтэ бэйэтэ өлбүтэ.
Кини 1924 сыллаахха Дьокуускайдааҕы былаас быһаарыытынан Булуҥ уокуругар сэбиэт былааһын тэрийэр НКВД боломуочунайынан анаммыта.
Бу сылга уокурук сэбиэттэрин бастакы сийиэһигэр Булуҥ уокуругун Сэбиэтин исполкомун бэрэссэдээтэлинэн талыллыбыта.
1926 сыл алтынньытыгар Винокуровы ВКП(б) КК Уезтааҕы баартыйа үлэһиттэрин куурустарыгар Москубаҕа үөрэтэ ыыппыттара. 1927 с. бэс ыйыгар ситиһиилээхтик бүтэрбитэ. Кини салҕыы Намҥа,Өлөөҥҥө,Бүлүүгэ:
1929 — 1931 сс. — Саха АССР Киин ситэриилээх кэмитиэтин (ЦИК) инструкторынан;
1931 — 1933 сс. — Нам оройуонун МТС-н дириэктэринэн;
1933 — 1934 сс. — Саха АССР Наркомземын сылгы иитиитигэр салалтатын начальнигынан; 1934 — 1935 сс. — Саха АССР Киин ситэриилээх кэмитиэтин (ЦИК) инструкторын быһыытынан Өлөөҥҥө 10 ый үлэлээбитэ. 1965 сыллаахха Өлөөннөр киниэхэ пааматынньык туруорбуттара.
1935 сыл алтынньытыттан 1936 сыл сэтинньитигэр дылы (13 ый) Москубаҕа ВЦИК иһинэн сэбиэскэй тутуу үрдүкү куурустарыгар үөрэммитэ.
1937 с. тохсунньу 1 күнүттэн 1938 сыл балаҕан ыйыгар дылы Бүлүү райисполкомун бэрэссэдээтэлинэн, онтон райком сэкиритээринэн үлэлээбитэ. Кэлин Бүлүүлэр, бу кэми санааннар, Бүлүү куоратын биир уулуссатын ааттаабыттара. Уһулуччулаах салайааччы саха бэйэтин норуотугар саамай туһалаах уонна сөптөөх быһаарыыларынан Доруобуйа харыстабылын наркомунан олорон өрөспүүбүлүкэ үрдүнэн туберкулез утары охсуһан элбэх диспансердары, санаторийдары аспытын умнубаттар. САССР Совнаркомун бэрэссэдээтэлинэн үлэлии сылдьан, саха дьонун аччыктааһынтан, хоргуйууттан быыһаабытын дьон билигин да ахтар, кэпсиир. Кини киин сиртэн бородууктанан көмөнү туруорсан, колхуостар иэстэрин сотторон тыһыынчанан киһи дьылҕатын быыһаабыта буолар. Чурапчылар дойдуларыгар төптөрү көһөн кэлиилэрин эмиэ көмөлһспүтэ диэн ахтыыга киирбит. Ону таһынан, сэрии кэнниттэн обком бастакы сэкиритээринэн олорон, Илья Егорович саха улуу суруйааччыларын: А.Е.Кулаковскай- Өксөкүлээх Өлөксөй,А.И.Софронов –Алампа, Н.Д.Неустроев баай нэһилиэстибэлэрин көмүскэһэн турууласпыт. Онон, саха сирин биир чаҕылхай салайааччыта төрөөбүт норуотугар хаалларбыт сырдык, үтүө аата үйэлэргэ хаалбыт.
Кини аатын үйэтитэн, 1996 сыллаахха Саха Өрөспүүбүлүкэтин Президенэ М.Е.Николаев Ыйааҕынан Нам улууһун Хатыҥ-Арыы орто оскуолатыгар И.Е.Винокуров аата иҥэриллибитэ.2007 сыллаахха Нам улууһун Хатыҥ-Арыытыгар И.Е.Винокуров түмэлэ аһыллыбыта. Төрөөбүт дьиэтин эркинигэр өйдөбүнньүк туруоруллубута. Намнааҕы педагогическай колледж аттыгар кини аатынан сквер арыллыбыта.Нам улууһугар икки сылга биирдэ Винокуров ааҕыылара ыытыллаллар.
Түмүкпүтүгэр , Илья Егорович Винокуров туһунан үлэбитин оҥоро сылдьан олус интэриэһиргээтибит, ахтыылары ааҕа олорон Илья Егорович сырдык-ыраас мөссүөнэ харахпытыгар көстөргө дылы гынна.Биир дойдулаахпыт туһунан олус элбэҕи биллибит уонна киэн туттарбыт өссө күүһүрдэ. Үтүө киһи аата үгүс үйэлэргэ иһиллэ турдун!
Гоголева Нарыйаана уонна Третьякова Туйаара, Дьокуускай куоратын 17 нүөмэрдээх орто оскуолатын 9 кылааһын үөрэнээччилэрэ, “Сайдын” медиа бөлөх эдэр корреспонденнара.