Балаҕан ыйын 26 күнүгэр оскуолабыт аактабай саалатыгар Судаарыстыбанас күнүгэр анаан ыҥырыылаах ыалдьыттар кэлэн көрсүү тэрийдилэр. Бастакы ыалдьыппыт — Иван Петрович Луцкан — Дьокуускай куоратын Өрөспүүбүлүкүтээҕи харах клиническэй балыыһатын кылаабынай бырааһа, медицинскэй наука хандьытаата. Иккис ыалдьыт- Махначевская Надежда Вячеславовна- СӨ эдэр ыччатын бэлиитикэтигэр уонна социальнай коммуникацияҕа бастакы миниистирэ.
Бүгүҥҥү көрсүүһүүнү оскуолабыт хуора СӨ үөрэҕириитин туйгуна Макарова Надежда Яковлевна салайааччылаах дойдубут Өрөгөй ырыатынан аста. Онтон “Дуолан” диэн Гоголева Вера Романовна салайааччылаах оскуола хоһоонньуттара тахсан, өрө көтөҕүллэн туран хоһоон аахтылар. Ол кэнниттэн ыҥырыылаах ыалдьыппыт Иван Луцкан Судаарыстыбанас күнүн туһунан кэпсээбитэ. Иван Луцкан СӨ хайдах үөскээбитин, кимнээх олук уурбуттарын, салайан кэлбиттэрин туһунан олус интэриэһинэйдик кэпсээбитэ. Саалаҕа барыта быйыл оскуоланы бүтэрээри сылдьар оҕолор мустаннар сэргээн олорон иһиттилэр. Үөрэнээччилэр ыалдьыкка интэриэһиргээбит боппуруостарын ыйыттылар. Ыалдьыппыт оҕолордуун истиҥник сэһэргэһэн барда.
Иккис ыалдьыппыт Мохначевская Надежда Вячеславовна 9 “в” кылаастарга Судаарыстыбанас уруогун ыытта. Кини оҕолорго Дьокуускай куорат олохтоммутун уонна төрүт сокуону ылбыппытын туһунан кэпсээтэ. Саха сирин былааҕын, гиэрбэтин туһунан эмиэ сырдатта.
Ону таһынан, 202 уонна 203 микрорайоннар икки ардыларыгар эдэр ыччакка аналлаах улахан саҥа комплекс былааннанар диэни сэргээн иһиттибит. Ол кииҥҥэ оскуола кэнниттэн кэлэн оҕолор дьиэҕэ үлэни оҥоруохтарын эмиэ сөп. Эдэр оҕолоох ыалларга оонньуур, аралдьыйар сирдээх буолар. Өссө эбии улахан роликовай киин баар буолуохтаах. Маны таһынан, Надежда Вячеславовна оҕолорго интэриэһинэй викторинаны бэлэмнээбит. Оҕолор хас сөптөөх эппиэт аайы уруучука, наклейка уонна сымнаҕас оонньууну үөрүүнэн ыллылар.
Оҕолор бу көрсүһүүлэртэн олус элбэҕи биллилэр, көрдүлэр. Түмүккэ, оскуолабыт дириэктэрэ Чиряев Анатолий Николаевич Иван Луцкаҥҥа махтал суругу туттарбыта. Онон бу күн оҕолорго олус туһалаахтык ааста.
Валерия ВАСИЛЬЕВА, Айта ЧЫЛБЫНОВА, Ева ИСАКОВА VII кылаас,
«Сайдын» медиакиин юнкордара, 17№-дээх оскуола, Дьокуускай
keskil14.ru