Бүгүн, балаҕан ыйын 15 күнүгэр, дьоллоох Дьокуускай куораппыт күнүгэр төрөөбүт 15 кырачаан оҕону төрүүр дьиэттэн таһаарыы үөрүүлээх күнэ Перинатальнай кииҥҥэ буолан ааста.
Үөрүүлээх тэрээһиҥҥэ Дьокуускай куорат баһылыга Евгений Григорьев, Дьокуускай куораттааҕы нэһилиэнньэ социальнай көмүскэлин уонна үлэҕэ салалтатын салайааччыта Семен Матвеев, Өрөспүүбүлүкэтээҕи клиническай балыыһа кылаабынай бырааһа Николай Васильев кыттыыны ыллылар.
Үгэс быһыытынан Дьокуускай куорат төрөөбүт күнүгэр күн сирин көрбүт кырачааттары, кинилэр ийэлэрин үөрүүлээх быһыыга-майгыга олоҕуран төрүүр дьиэттэн таһаараллар. Ол курдук, Дьокуускай куорат 389 сааһын көрсө, балаҕан ыйын 12 күнүгэр, Сахабыт сиригэр 7 уол уонна 8 кыыс күн сирин көрдө.
Уус-Алдан улууһун Чараҥ нэһилиэгин олохтооҕо Айталина Макеева 10 оҕотун төрөөбүт. Элбэх оҕолоох дьоллоох ийэ 5 уоллаах уонна бу бэһис кыыһын оҕоломмут. Кырачааннарын икки эбээлэрин аатынан Татьяна диэн номнуо сүрэхтээбиттэр.
Онтон Бүлүү куоратыттан сылдьар эдэркээн Калиста Онопрова аан бастакытын ийэ буолар дьолун биллэ. Кини кырачаан уол оҕоҕо күн сирин көрдөрөн долгуйуута уонна үөрүүтэ улахан.
Кэлбит ыалдьыттар ийэлэргэ сибэкки дьөрбөтүн кытары өйдөбүнньүк бэлэхтэри туттардылар. Онтон социальнай көмүскэл салалтатыттан дьиэ кэргэҥҥэ туһуламмыт судаарыстыбаттан көмө туһунан бэлиэ брошюра туттарылынна.
Кырачааттарга уонна ийэлэргэ чэгиэн туругу, дьолу-саргыны, дьиэ кэргэҥҥитигэр нус-хас олоҕу баҕара хаалабыт. Оҕо төрөөһүнэ — дьол, оҕо — олохпут салҕыыта.
Үөрүүлээх тэрээһинтэн видеоны манна көрүҥ:
Суруйда Анна СЛЕПЦОВА.
Видео Петр МАТВЕЕВ.