Бүгүн тохсунньу 12 күнүгэр үгэс буолбут сылын аайы тэрийиллэр В.П. Ларионов аатынан Өрөспүүбүлүкэтээҕи «Инникигэ хардыы» кэмпириэнсийэ арыллыыта «Триумф» спорт киинигэр буолла. Быйыл кэмпириэнсийэ 13 хайысханан үлэтин ыытта, өрөспүүбүлүкэ араас муннуктарыттан 1500 эдэр чинчийээччилэр кэрэхсэбиллээх бырайыактарын дьоҥҥо-сэргэҕэ билиһиннэрдилэр. Уопсайа 300 эксперт сыанабыл туруорарга кыттыыны ыллылар, үөрэнээччилэргэ үлэлэрин хаҥатарга сүбэ-ама биэрдилэр.
Сахабыт сирин Ил Дархана оҕолор үлэлэрин кытта билсэн баран олус сэҥээрдэ. Кыттааччыларга, учууталларга уонна ыалдьыттарга эҕэрдэ тылларын тириэртэ.
«Бүгүҥҥү үөрүүлээх күнүнэн, «Инникигэ хардыы» кэмпириэнсийэ 30 төгүлүн саҕаламмытынан итии-истиҥ эҕэрдэ! Бу кэмпириэнсийэ өрөспүүбүлүкэбит чаҕылхай эдэр чинчийээчилэрин хаһыс да сылын түмэр, дойдубут үрдүнэн үөрэх-билим хайысхатын үрдүк таһымнаах тэрээһинэ, Уһук Илин уокуругар оскуола оҕолоругар аналлаах бастыҥ бырайыак буолар»
Айсен Николаев этэринэн, оҕолор үлэлэрин таһыма хас сыл ахсын үрдээн иһэр. Билиҥҥи кэмҥэ олус наадалааах бырайыактары чинчийбиттэр диэн кэрэхсэбилин, киэҥ туттуутун бэлиэтээтэ.
«Биһиги 30 сыл устата элбэх биллэр чинчиээйиилэри иитэн таһаардыбыт. Инженернай, сүрдээх практическай, араас эйгэҕэ туһаныллар үлэлэр элбииллэр. Холобур, космоска бэйэбит спутникпытын ыыттыбыт. Бу бырайыак кэмпириэнсийэбит биир түмүгэ буолар» — диэн Саха сирин МАН ректора Василий Павлов кэпсээтэ.
Салҕыы эдэр кэриспэндьиэммит Туйаара Мамонтова видеорепортажын көрүҥ.
keskil14.ru