Быйыл оскуоланы бүтэрэр оҕолор иннигэр идэлэрин талар уустук быһаарыныыны ылынар сорук турар. Дьокуускай 17 №-дээх оскуолатыгар араас идэлээх испэсэлиистэр кэлэн, оҕолорго бэйэлэрин идэлэрин билиһиннэрэр үтүө үгэс баар. Бэҕэһээ ФСБ Саха сиринээҕи салаатын каадырын отделын инспектора 11 «В» үөрэнээччилэрин кытары көрүстэ, ФСБ Академиятыгар, Москватааҕы пограничнай институкка, ФСБ институтугар үөрэххэ киирэргэ сүбэлээтэ.
11 «В» кылаас үөрэнээччилэрэ Юля Федорова, Айта Пухова:
— Биһиги оскуолабытыгар профориентационнай билсиһии буолан ааста. Бу билсиһиигэ ФСБ үлэтин, салалтатын туһунан олус интэриэһинэйдик кэпсээтилэр. Бу хайысханан барар оҕолорго наһаа наадалаах билсии-көрсүү буолла. Ханнык предметы ЕГЭ экзаменыгар туттараргыттан саҕалаан, бу идэ киһи олоҕун үчүгэй өттүнэн уларытар кыахтааҕын туһунан кэпсээтилэр.
Өскөтүн ФСБ идэтинэн барар буоллаххына, таҥаскын-сапкын, дьиэҕин-уоккун судаарыстыба үөрэххин бутэриэххэр диэри иитэн-хааччыйан таһаарар эбит. Үөрэххин бутэрдэххинэ, үлэтэ суох хаалбат эбиккин, бүтэрдин да, ханна ыыталлара эрдэттэн быһаарыллан турар. Ол гынан баран, бу идэ суола, олохпутугар көрсөр ыарахаттар баалларын курдук, эмиэ туохтан эмэ эмиэ аккаастаныаххын наада эбит. 
Холобур, дойдубут Россия таһыгар тахсар көҥүллэммэт. Аныгы дьоҥҥо баҕар бу чахчы улахан оруоллааҕа буолуо. Ол да иһин баҕарар киһи бэйэтэ өйдөөн-төйдөөн, барытын ыараҕалатан туран, ФСБ кэккэтигэр үлэлиири талыахтаах.
Маны таһынан, Альбина Анатольевна бэйэтэ хайдах бу идэҕэ кэобитин туһунан эмиэ кэпсээтэ. Онон бу идэни талыах санаа үөскээтэ.
Маннык интэриэһинэй көрсүһүү ааста, бары сэргээн иһиттибит, махтанныбыт. Биһиги оскуолабытыгар бу маннык лекция, аһаҕас кэпсэтии балайда ыытыллар. Уопсайынан, профориентацияны биһиги оскуолабытыгар өрүү ыыталлар. Оскуоланы бүтэрэн, киэҥ эйгэҕэ барар оҕолор инникилэрин сөпкө толкуйдаан быһаарынныннар диэн араас тэрээһин барар.