Мин бүгүн эһиэхэ дойду кэскилин туһугар турууласпыт, киэн туттар биир дойдуулаахпыт, биһиги геройбут сырдык аатын үйэтитэн кини туһунан биир дойдулаахтарын аххтыларыгар олоҕуран кэпсиэхпин баҕарабын.
Илья Васильевич Никитин 1990 сыллаахха балаҕан ыйын 27 күнүгэр Чурапчы улууһун Хадаар нэһилиэгэр түөрт оҕолоох Александра Дмитриевна уонна Василий Афанасьевич Никитиннэр дьиэ кэргэттэригэр иккис оҕонон күн сирин көрбүтэ.
1997 сыллаахха Хадаар орто оскуолатыгар маҥнайгы кылааска үөрэнэ киирбитэ. Илья оҕо эрдэҕиттэн үөрэххэ-билиигэ тардыһар, спорт күрэхтэригэр уонна театральнай куруһуокка ситиһиилээхтик кыттар этэ. Илья оскуолатааҕы сылларыгар бастакы улахан ситиһиитэ географияҕа улуустааҕы олимпиадаҕа иккис миэстэни ылбыта буолар.
2011 сыллаахха Чурапчы колледжыгар сварщик идэтигэр үөрэнэ сылдьан, Маша Санникованы көрсөн, тыал буолбута. 2013 сыллаахха уол оҕоломмута. Билигин уола Сайаан Томпо улууһун Кириэс Халдьаайытыгар 5-с кылааска үөрэнэр.
Илья 2017-2018 сс. ытык иэһин толорон Хабаровскай куоракка 98563 №-дээх байыаннай тимир суол чааһыгар сулууспаалабыта. Үчүгэй сулууспатын иһин хаартыската «Бочуот дуоскатыгар» тахсыбыт. Армияттан кэлэн баран, 2019 сыллахха Саха сирин волейболун федерациятыгар чилиэнэ буолбута.
Ити курдук дьоһуннаах олоҕунан, үлэтинэн-хамнаһынан иннин диэки баран истэҕинэ, анал байыаннай дьайыылар саҕаланаллар. 2022 сыллаахха балаҕан ыйын 29 күнүгэр бэбиэскэ тутан, биир да тылынан утары барбакка, туохтан да куттаммакка, эр киһи холобурун көрдөрөн, Аҕа дойдутун көмүскэлигэр туруммута.
Илья дойдутун – Хадаарын сүрэҕэр куруук чугастык тутара. Бэйэтигэр «Хадаар» диэн ааты ылыммыта. Хабаровскай куорат Вятское дэриэбинэтигэр биир ый бэлэмнэнэн баран, анал байыаннай дьайыылар буола турар сиригэр Украинаҕа барбыта. 63 №-дээх 14-с инженернэй биригээдэ сапернай ротатыгар сулууспалаабыта. Бастаан сүрүннээн миинэ ыраастааһыныгар сылдьыбыт. «Азовсталь» собуоту ыраастаабыттара. «Собуот бэйэтэ куорат курдук улахан», – диэн дьонугар кэпсиир эбит.
Чугас дьонноро ахталларынан, Илья олоххо тапталын, киһитийиитин сүтэрбэтэҕэ. Бу сэрии хараҥатын да үрдүнэн сырдык тыыны харыстыыр дьулуур, эр санааланыы холобура буолар.
2023 сыллахха кулун тутар 25 күнүгэр бойобуой сорудахха сылдьан миинэҕэ түбэһэн, икки атаҕар ыараханнык бааһыран, Москваҕа Бурденко госпиталыгар хаста да эпэрээсийэлэммитэ. Салгыы Хабаровскайга, Читаҕа, Дьокуускайга эмтэммитэ.
Ыараханнык бааһыран сытар кэмигэр төрөөбүт Хадаарын, ытык Чурапчытын, Саха сирин дьоно-сэргэтэ биир киһи курдук түмсэн, өйөбүл, көмө буолбуттара. Илья Васильевич бу үтүө санааҕа олус үөрэрэ, төрөөбүт дойдутун дьонун сомоҕо күүһүн бигэргэтэрэ. Бу – биһиги, саха дьонун, ыксалга өйөһөр, биир сомоҕо буолар үгэспит күүһүн көрдөрөр дьиҥнээх холобур, омукпут күүһэ.
Илья эмтэнэн баран, передовойга штурмовой биригээдэлэр киириэхтээх суолларын ыраастыыр, хараҥаны сырдатар сапернай үлэҕэ барбыта. 2024 сыллаахха ыам ыйын 30 күнүгэр разведкаҕа сылдьан, утарсааччылар ытыалааһыннарыгар түбэһэн, ыараханнык бааһыран, сатаан эвакуацияламмакка, 33 эрэ сааһыгар күн сириттэн суох буолбута.
Көмүс уҥуоҕа 2025 сыллаахха кулун тутар 4 күнүгэр төрөөбүт дойдутугар көтөҕүллүбүтэ.
Илья Васильевич Никитин олоҕо төрөөбүт дойдутугар, дьонугар-сэргэтигэр бэриниилээх буолуу, хорсун санаа, дьулуур үтүө холобура буолар. Биһиги кинини хаһан да умнуохпут суоҕа. Дойдутун туһугар толук уурбут биир дойдулаахпыт Илья Никитин диэн ахтан-саныы сылдьыахпыт.
Ахтыылартан түмэн бэчээккэ бэлмнээтэ
Саша Ксенофонтов, XI кылаас,
С.Д. Флегонтов аатынан Хадаар орто оскуолата, Чурапчы