Мэҥэ-Хаҥалас улууһугар 66-с төгүлүн ыытыллар В.К. Степанов аатынан культура уонна спорт эстафетатын иһинэн оскуола үөрэнээччилэрин уонна уһуйаан иитиллээччилэрин икки ардыгар ыытыллар фестивальга оскуола, нэһилиэк чиэһин көмүскээтибит.
«Дойдубут туһугар — бары бииргэ» диэн девизтээх күрэхпит олунньу 19 күнүгэр буолан ааста. Балаһыанньаҕа олоҕуран уус-уран оҥоһуктар быыстапкалара оҕону төрүт дьарыкка сыһыаран сахалыы эйгэни тэрийиигэ туһуланнылар. Оҕолор оҥоһуктарын быыстапката үрдүктүк сыаналанан, Лауреат үрдүк аатын ылла. Туой оҥоһуктан саҕалаан кыбытык тигиигэ тиийэ үлэлэр турдулар. Оҕолору айымньылаах үлэҕэ уһуйбут салайааччыларынан буолаллар: Иванова Н.Н., Оконешникова Н.Н., Попова Э.В., Протодьяконова А.А.
А.Е. Кулаковскай-Өксөкүлээх Өлөксөй “Сайын кэлиитэ” айымньытынан туруорбут фольклорнай композициялара дириҥ ис хоһоонноох буолла. Манна уопсайа 129 үөрэнээччи кытынна. Оҕолор тойуктаан, хомустаан, оһуохайдаан да ыллылар. Түһүлгэ тула олорон дьиҥнээх ыһыах ыстылар. Элбэх оҕону түмэ тарпыт салайааччыларбыт: Протодьяконова А.А., Еремеева Д.А., Попова Н.В., Павлова С.Ф.
Уолаттар уус-уран ааҕыыларын дьүүллүүр сүбэ биһирээтэ. Уолаттар өссө салҕыы сайда туралларыгар баҕа санаатын эттэ.
Ону таһынан оҕолорбут сахалыы көрүҥ илии-атах оонньууларыгар «Биэс төгүл куобах», Хабылык, хаамыска», «Тутум эргиир», «Ойбонтон уулааһын», «Көтөх ынаҕы туруоруу”, «Суоска тэбиигэ” күрэхтэстилэр.
Эстафета түмүгүнэн 4,06 баалы ыллыбыт. Дириҥ ис хоһоонноох күрэх оҕолорго суолтата улахан.
Оксана Петрова, В.Н. Оконешников аатынан Павловскай орто оскуолатын пресс-киинэ.