Оскуолабытыгар Аҕа дойду Улуу сэриитин ыар сылларыгар сэбиэскэй норуот көрдөрбүт булгуруйбат модун санаатын, тулуурун туһунан кэпсиир тэрээһиннэр ыытыллаллар. Хас биирдии тэрээһин киһи өйүгэр-санаатыгар суолу-ииһи хаалларар.
1944 сыллаахха тохсунньу 27 күнүгэр Ленинград куорат блокадаттан босхоломмут күнүгэр хорсун быһыы акциялара ыытыллыбыттара. Ленинград олохтоохторо кыайыыга эрэллээх, хорсун уонна тулуурдаах буоланнар 872 хонук устата немец фашистарын сидьиҥ быһыыларын тулуйбуттара, куораттарын туран биэрбэтэхтэрэ.
Хорсун санаа акциятыгар Ленинград блокадатыгар дьон дьылҕаларын туһунан кэпсэппиппит. Кинилэр ортолоругар Таня Савичева диэн кыыс дневнигэ оччотооҕу кэм дьиҥнээх туоһута буолар.
Акциябыт иккис күнүгэр Ленинград блокадатын, Сталинград иһин кыргыһыы уонна өйдөбүнньүк паамытынньыктар тустарынан үс түһүмэхтээх 30 ыйытыылаах оонньуу буолла. Билиҥҥи оҕолор сэрии кэминээҕи историяны син өйдүүр эбиппит. Ол гынан баран паамытынньыктарга билиибитин кэҥэтиэхпитин наада. Ыйытыылар таһынан киинэ көрбүппүт, виртуальнай музейга сылдьыбыппыт, «Блокада килиэбин» боруобалаабыппыт, экспонаттары көрбүппүт.
Маннык тэрээһиннэр үөрэтэр өрүттэрэ элбэх. Дойдубут историятын, сэрии алдьархайын сүрэхпитигэр чугастык ылынан өйдүүбүт.
Ангелина ДАНИЛОВА, XI кылаас,
В.И. Ленин аатынан Уолба орто оскуолата, Таатта