Мин иллэҥ кэммэр уруһуйдуурбун, оҕуруонан симэхтэри онорорбун сөбүлүүбүн. Оскуола, улуус иһинэн ыытыллар араас күрэхтэргэ кыттыыны ылабын.
Бүлүү улууһун үөрэҕириитин салаата 2026 сылы Ааҕыы сылынан биллэрбитэ. Онон сиэттэрэн үөрэҕирии салаата олунньу ый саҕаланыыта «Ааҕыы сыла» эмблематын оҥорорго күрэх биллэрбитэ. Бу күрэх буолуон иннигэр биһиги оскуолабыт гербэтин оҥорууга күрэххэ кыттыбытым. Ол күрэххэ кыттаарыбын геральдика диэн науканы үөрэппитим. Эмблемаҕа, гербэҕэ, былаахха хайдах өҥнөр баар буолуохтааҕын, ханнык өнү туттубаттарын, гербэлэргэ баар араас ойуулар туох суолталаахтарын үөрэтэн элбэх биллиини ылбытым.
Ааҕыы сылын эмблематын күрэҕэр элбэх оҕо кыттыбыта. Мин бэйэм хас да араас эмблемалары оҥорон ыыппытым. Олортон биир эмблемам кыайбыта. Миигин үөрэҕирии салаата олунньутааҕы сүбэ мунньахха М.Н. Жирков аатынан култуура дыбарыаһыгар үөрэх салаатын начаалынньыга Наталия Михайловна Семенова кыайыылаах дипломун уонна кинигэ бэлэх туттарбыта. Мин онно наһаа үөрбүтүм уонна долгуйбутум.
Нарыйаана Буслаева,
Иван Михайлович Гоголев аатынан Чочу орто оскуолатын 5 кылааһын үөрэнээччитэ, Бүлүү