Бүтүн Россия үрдүнэн ыытыллар «Добрые крышечки» диэн акцияҕа биһиги оскуолабыт оҕолоро төрдүс сылын кыттабыт.
Бу акцияҕа кыттарга аан бастаан нуучча тылын уонна литературатын учуутала Ксения Александровна Зорина көҕүлээбитэ.
Бу экологическай благотворительнай акция сүрүн сыала биһиги олорор планетабытын ыраас гыныы уонна доруобуйаларынан хааччахтаах, тулаайах оҕолорго көмөлөһүү буолар. Хомуллубут пластик хаппахтар мунньуллан заводка ыытыллаллар, онтон киирбит үп көмөҕө барар. Биһиги хомуйар хаппахтарбытын үчүгэйдик сууйабыт-сотобут, ыраастыыбыт уонна анал иһиккэ аҕалан кутабыт. Бу акцияҕа 1-11 кылаас оҕолоро бука бары кытталлар.
Бастакы сылларбытыгар биһиги барыта 20-чэ киилэ хаппаҕы туттарбыппыт. Хомуллубут хаппахтары Ксения Александровна Дьокуускай куоракка илдьэн туттарбыта.
Онтон киирбит харчы доруобуйаларынан хааччахтаах оҕолорго анал коляскалары атыылаһарга туһаныллыбыт эбит.
Биһиги маннык акцияларга кыттарбытыттан олус үөрэбит, улахан дьыалаҕа сэмэй кылааппытын угарбытыттан астынабыт.
Лилиана Алексеева, “Кустук” пресс-киин, Күүкэй Сунтаар.