Быйыл хаһааҥҥытааҕар даҕаны иэдээннээх ойуур баһаардара буола сырыттылар. Билигин үрдүбүтүгэр ып-ыраас күөх халлааны, чаҕылхай күммүтүн көрө-көрө үөрэбит, ыраас салгыны утаппыттыы эҕирийэбит. Бу сайын аҥаардас бу куораппыт иһэ буруонан туолан, киһи тыыммат үлүгэрэ буола сырытта. Онтон уот баһаары эт харахтарынан көрбүт, баһаар умулларыытыгар үлэлээбит дьон — дьиҥнээх дьоруойдар.
Өрөспүүбүлүкэбит үрдүнэн төһөлөөх элбэх доброволец баҕа өттүнэн бу ыарахан үлэҕэ сырытта, баһаары кыайда! Саха дьоно түмсүүлээхпитин бу сайыҥҥы быһылааннар өссө биирдэ дакаастаатылар.
Ойуур баһаарын умулларыытыгар кыргыттар, дьахталлар, оҕолор эмиэ туора турбатылар. Бары бииргэ күргүөмүнэн айылҕабыт, олорор сирбит-уоппут туһугар турууластылар.
Биир оннук доброволеһынан эдэркээн Дайаана Попова буолар. Кини өрөспүүбүлүкэтээҕи добровольческай уопсастыбаннай штабка бэйэтэ баҕа өттүнэн тиийэн кэлбитэ. Бэйэтэ идэтинэн сир үлэһитэ, М.К.Аммосов аатынан ХИФУ горнай институтун үөрэнэн бүтэрбит. Быйыл сайын 203 микрооройуоҥҥа баар быһааччылар сулууспаларыгар үлэлээтэ.
Атырдьах ыйын 10 күнүгэр ЛОРПа доброволецтарын этэрээттэрэ тэриллэн Нам Таастааҕар 14 киһи буолан баһаары умулларыыга сырыттылар, ол иһигэр Дайаана Попова эр дьону кытары тэҥҥэ сылдьыспыта.
Лааҕыр баһаар уотун линиятын таһыгар тохтообута. Нэһилиэккэ чугаһыыр кутталлаах буолан, этэрээт тута гаас уонна электричество ааһар 7 км сирдээх учаастакка үлэлээбиттэрэ. Тута салайааччынан ЛОРПа сисадмина Роман Николаев талыллыбыта. Бастакы үс суукка тохтоло суох түүн 3 чааска диэри үлэ барбыта. Нэһилиэккэ уот чугаһаабытын диэн минерализованнай балаһалар оҥоһуллубуттара.
Маны тэҥэ Таастаах нэһилиэгэр куттал суоһаабытыгар ЛОРПа этэрээтин кытары Суорун Омоллоон аатынан Опера уонна балет театрын үлэһиттэрэ тиийэн бииргэ үлэлээбиттэрэ. Театр этэрээтин Олег Макаров салайан илдьэ сылдьыбыта.
Бастаан утаа 2 аҥаардыы биэрэстэ, ол аата кэлэ-бара биэстии биэрэстэни хаамаллар эбит. Онтон «Якутлесресурс», МЧС үлэһиттэрэ утары уоту ыыппыттарын кэннэ харабыллыыр сирдэрэ 10-нуу биэрэстэҕэ тиийэ уһаабыт. Бу тыаҕа олохсуйбут Дайааналаах мобильнай биригээдэлэрин сэргэ бөһүөлэктэн уунан сылдьар дьон эмиэ үлэлээбиттэр.
Дайаана санаатын бу курдук үллэстэр:
— Барарбытыгар доброволецтар уопсастыбаннай штабтарыттан таҥас-сап, ас-үөл, сэп-сэбиргэл ылан илдьэ барбыппыт. Бачыыҥкабын сыыһа соҕус талбыппын. Уопсайынан наскынан буолбакка, кулукуну баана сылдьыахха баар эбит. Кыргыттар, дьахталлар харабыллааһын үлэтигэр сылдьыахтарын сөп эбит дии санаатым. Ол эрээри бэйэни кыанар буолуохха наада. Аҥаардас 15 лиитирэ уулаах ранеһы сүгэн баран хаамар сылаалаах соҕус. Уопсайынан биһиги көмөлөһөөччү буолуохпутун сөп эбит. Холобур, мин бензопиланан сатаан туттубат буоллаҕым дии. Анал үөрэхтээх буоламмын эбитэ дуу, утары уоту ыытарга илдьэ бара сылдьыбыттара. Аҥардас улахан уоту да көрөрү тулуйуохха уонна аһарыныахха наада эбит.
Мин санаабар, билиҥҥи ойуур кодексатын уларытан, урукку Сэбиэскэй Сойуус саҕанааҕы ойуур кодексатынан үлэ барыахтаах. Аны лесниктэр ахсааннарын элбэтэргэ эмиэ хамсааһын баар буолуохтаах. МЧС анал подразделениялара, инженернэй буойуттар биһиги өрөспүүбүлүкэбит иһигэр эмиэ баар буолуохтаахтар. Оччоҕо бу үлүгэр алдьархайдаах ойуур баһаардара тахсыа суох этилэр.
Сахабыт сирин хорсун-хоодуот дьонугар барҕа махтал! Сомоҕолоһуу баар буолан барытын этэҥҥэ кыайдахпыт! Маннык алдьархайдар аны хаһан даҕаны хатыламматыннар!
Суруйда Анна СЛЕПЦОВА.