Арассыыйа үрдүнэн ыытыллар «Дьоһуннааҕы кэпсэтии» бырайыак чэрчитинэн, 5 «А» кылаас үөрэнээччилэрэ ураты дьоҕурдаах, дэгиттэр талааннаах маастары кытта көрсөн, норуот айымньытын кистэлэҥ аан дойдутун арыйдылар.
Бүгүн, сэтинньи 19 күнүгэр, С.П. Данилов аатынан Бэрдьигэстээх орто оскуолатыгар 5 «А» кылаастарга «Дьоһуннааҕы кэпсэтии» уратытык ааста. Оҕолорго силистэн, удьурхайтан, ууртан оҥоһуктар (корнепластика) этно-балаҕан-түмэлин төрүттээччилэрэ — Антонина Николаевна уонна Валерий Моисеевич-Сиэн Харах Дьячковскайдар ыалдьыттаатылар. Түмэл туһунан кэпсэтии, өбүгэ духуобунай сайдыытын харыстааһыҥҥа анаабыт дьон тылыттан иһиллэн, ураты тыыннанна.
Дьячковскайдар — саха төрүт кыстык дьиэтигэр, балаҕаҥҥа, тардыллыбыт ураты кэллиэксийэни харыстааччылар буолаллар. Бу дьиҥнээх өбүгэ эйгэтигэр кинилэр «оҕолоро» — силистэн оҥоһуктара — дьиҥнээхтик «тиллэллэр».
«Биһиги түмэлбит — көннөрү мал-сал мунньуута буолбатах. Бу — балаҕан дьиҥнээх өйдөбүлүнэн: тыа иччилэрэ, олоҥхо дьоруойдара уонна удьуор өйө-санаата мас силиһигэр хатанан олорор дьиэлэрэ», — диэн Антонина Николаевна кэпсээнин саҕалаата. Корнепластика хаһан төрүттэмитин, Аан дойдуга ханна киэҥник тарҕаммытын, Сахабыт сиригэр төһө киэҥник биллэрин сырдатта.
Валерий Моисеевич-Сиэн Харах силистэр эриллэн олороллоругар хайдах бэлэм дьүһүнү көрүөн сөбүн оҕолорго көрдөрдө. «Мас бэйэтин олоҕун олорор, онтон силистэн оҥоһук буолан — устуоруйа уонна номохтор харыстааччыларын быһыытынан үйэлээх олоҕун саҕалыыр. Биһиги бу дьүһүн күн сирин көрөрүгэр эрэ көмөлөһөбүт», — диэн быһаарда. Ханнык баҕар оҥоһугу саҕалыырга сүрүн уустуга – көрүү диир. Туох кыыл, көтөр, дьоруой буолан тахсарыгар толкуйдуурга ыарахаттары көрсөбүн эбэтэр уһун толкуйга түһэбин диэн аһаҕастык эттэ.
Үөрэнээччилэр биир тыынынан көннөрү мас мутуга хайдах Иван Крылов үгэстэрин эбэтэр Александр Пушкин «Руслан уонна Людмила» поэматын дьоруойдарыгар, судургу чарапаахыга эбэтэр былыргы динозаврга кубулуйалларын туһунан сэргээн иһиттилэр. Оҕолор түмэл үлэтэ бу, бастатан туран, чинчийээччи сырата уонна кэрэни таба көрөр дьоҕура буоларын биллилэр.
«Бүгүҥҥү көрсүһүү оҕолору кытта култуура төрүттэрин (силистэрин) туһунан кэпсэтэр төһө суолталааҕын көрдөрдө», — диэн 5 «А» кылаас салайааччыта Виктория Петровна Колодезникова санаатын үллэһиннэ.
Кэпсэтии олус интэриэһинэй буолан, элбэх үөрэнээччи бу ураты этно-балаҕаны бэйэ хараҕынан көрөргө баҕатын биллэрдэ.
Виктория Петровна Колодезникова, С.П. Данилов аатынан Бэрдьигэстээх орто оскуолатын 5 «а» кылааһын салайааччыта