Мин дьиэбэр саамай чугас доҕорум — Лютик. Кини куоска оҕото. Билигин сэттэ ыйдаах. Лютигы миэхэ сайын от ыйыгар, икки ыйдаах куосканы Уус-Алдаҥҥа эбэбин кытта күүлэйдии бара сырыттахпына, ийэм бэлэхтээбитэ. Кини оҕо буолан наһаа үчүгэй, мэник, киһини тэһитэр. Лютик-маҥаннаах саһархайдыҥы дьүһүннээх. Ып-ыраас, мап-мааны. Лютик-атыыр куоска. Кини күнүс таһырдьа тахсан хаарга, дьиэ үрдүнэн сүүрэрин сөбүлүүр. Өссө хараҕын киэҥник көрө-көрө охсуһа сатыыр идэлэммит.
Лютик кутуйаҕы тутар, оҕо буолан сороҕор куоттарар. Кутуйаҕы туттаҕына оонньуур. Маҕаһыынтан ас ылан аһатабыт. Лютик саҥарбат, ол эрээри барытын өйдүүр. Мин үөрэнэр кэммэр, учууталлар кэллэхтэринэ, уруогу мэһэйдээбэтин диэн муоста анныгар хаайабыт. Лютик барахсан 6 уруок бүтүөр диэри муоста анныгар сылдьар. Үөрэнэн бүттүм да, Лютигы тута муоста анныттан таһаарабыт. Кини наһаа аччыктаабыт буолар, оччоҕо тута ас көрдүүр. Сорох күн кутуйахтары сиир быһылаах. Оччоҕо аһы төрүт көрдөөбөт. Утуйарыгар эбэм хоско киллэрбэт. Ол иһин миигин кытта утуйбат. Заалга — диваҥҥа утуйар. Моонньугар ошейниктаах, мин куоскам буолара билиннин диэн иилбитим. Мин чугас доҕорбун Лютигы олус таптыыбын.
Альмира ТАБЫРЫНОВА V кылаас,
Дэбдиргэ, Таатта улууһа.