Сахабыт сирин үрдүнэн бастыҥ тустуук оҕолору быһаарар биир биллэр күрэхтэһиибит “Дмитрий Данилов аатынан Саха сирин 2008-2009 сыллаах төрүөх оҕолорго көҥүл тустууга первенствота” олунньу 3-5 күннэригэр Ньурба сиригэр ыытыллаары турар. Ону көрсө Дмитрий Данилов чаҕылхай кыайыытын, олоҕун туһунан сырдатабыт.
Дмитрий Данилович Максимов – Ньурба оройуонун Үөдэй нэһилиэгиттэн төрүттээх сахалартан аан маҥнайгынан көҥүл тустууга СССР маастарын нуорматын толорбут киһи буолар. Бу бэлиэ түбэлтэ 1959 сыллаахха сэтинньи ый бүтэһигэр Грознай куоракка буолбута. Дмитрий Данилов бу улахан кыайыыта саха тустууктарыгар өрө көтөҕүллүүнү, дуоһуйууну аҕалбыта. Сахалар да бүтүн сойуус ааттаах бөҕөстөрүн кытары тэҥҥэ киирсиэхтэрин сөп эбит диэн санааны киллэрбитэ, психологическай мэһэйи туораппыта. Бу туһунан олус дьэҥкэтик уонна истиҥник Россия уонна Саха сирин үтүөлээх тренера Николай Волков ахтыбыт. Дмитрий Даниловы ураты приёмнардааҕын, техниката атынын, үчүгэйин иһин Россия сборнайыгар ылбыттара. Ити кэннэ Саха сирин тустууга федерацията кэпсэтиһии ыытан саха тустууктарын Бүтүн Сэбиэскэй сойуус чемпионатыгар быһа кытыннартаабыттара. Онтон Дмитрий Данилов бу кэмнэргэ Сэбиэскэй сойуус кыахтаахтарын кытары тэҥҥэ аан дойду аренатыгар тиийэ киирсэрэ.
Билигин биһиги тустууктарбытын ханнык да дойдуга тэҥҥэ көрөллөр, кинилэри кытары аахсаллар, сыаналыыллар, бу манна Дмитрий Данилов өҥөтө улахан.
Дмитрий Максимович Данилов олоҕун барытын оҕо спордугар, физкультураҕа анаабыта. «Урожай» обществоҕа бэрэссэдээтэллээбитэ, олимпийскай эрэллэр училищелара аһыллыытын туруорсуспута, маҥнайгы дириэктэрэ этэ. Просвещение министиэристибэтигэр оскуолалар инспектордарынан үлэлии сылдьан Дмитрий Коркинныын ыкса үлэлэспитэ. Чурапчы оскуола-интэринээтэ сайдарыгар, үүнэригэр улахан кылааттаах. Онон чурапчылар кинини сыаналаан, кини аатынан күрэхтэһиини кэккэ сылларга үтүө суобастаахтык ыытан кэллилэр. Аны билигин, Дмитрий Максимович Данилов бэйэтин төрөөбүт төрүт дойдутун дьоно — ньурбалар, кини аатынан тустуу бырааһынньыгын таһымнаахтык ыытыах тустаахпыт. Бу таһымнаах күрэхтэһии саҥа ааттары арыйар, биһиги инники эрэллэрбитин таһаарар.
Дмитрий Максимович Данилов – тустуук, салайааччы, судьуйа, тренер уонна үтүө киһи, саха бөҕөстөрө киэн туттар, холобур оҥостор киһилэрэ буолар.
Наталия Жданова, «ЫЛЛЫК» Ньурба, Хаҥалас.