Көмүлүөк тула олорон, дьиэ кэргэнинэн П.А. Ойуунускай айымньыларын ааҕыы В.А. Петрова аатынан түмэлгэ ыытылынна.
Онно II кылаастан Ждановтар, Семеновтар кытыннылар. Хоһоону ааҕалларын видеоҕа устан, Национальнай библиотека уонна “Кэскил” бэчээт кыһата тэрийбит өрөспүүбүлүкэтээҕи күрэххэ ыыттыбыт.
Ждановтар ийэлэрэ Наталья Владимировна «Татыйык кыыс» хоһоонунан күрэҕи аста. Кини олохтоох оскуолаҕа омук тылын үөрэтэр. Аҕа баһылык, Н.И. Кочнев аатынан Хаҥалас орто оскуолатын физкультураҕа учуутала Леонид Александрович «Өрүөл кэриэһинэн» салҕаата. Уоллара Саша — алын сүһүөх оскуолатын быйылгы бүтэрээччитэ, туйгун үөрэнээччи. Тустуунан утумнаахтык дьарыктанар, араас таһымнаах элбэх турнир абсолютнай кыайыылааҕа. Саша «Кылыҥкай» хоһоону аахта. Балта, II кылаас туйгун үөрэнээччитэ Эвелина «Дьулуруйар Ньургун Боотур» олоҥхоттон быһа тардан толорбутугар, дьоно: «Ноо!»— диэн сэҥээрдилэр.
Бу курдук Ньурба улууһун Н.И.Кочнев аатынан Хаҥалас орто оскуолатын алын сүһүөх учуутала Алексеева Прасковья Николаевна көҕүлээһининэн, В.А. Петрова аатынан түмэл салайааччыта Анисимова Зинаида Васильевна көмөлөһөн, оскуола библиотекара Антонова Галина Никитична уонна алын сүһүөх методическай холбоһугун салайааччыта Осипова Мария Николаевна оператордааннар, «Дьиэ кэргэнинэн Ойуунускайы ааҕабыт» видео күрэххэ матырыйаал бэлэмнээн ыыттыбыт.
П.Н. Алексеева,
«Ыллык» пост салайааччыта.
Ньурба улууһа.