Бүгүн, алтынньы 8 күнүгэр, Уһук Илиннээҕи норуоттар төрүччүлэрин форумун иһинэн Айыы кыһата үөрэх дьиэтигэр иккис төгүлүн «Дьиэ кэргэним үйэлээх баайа» куонкурс-быыстапка тэрилиннэ.
Быыстапка сүрүн сыала – өбүгэ малын-салын харыстааһын, ытык өйдөбүл оҥорон үйэтитии.
Тэрээһин Дьокуускай куорат уонна Горнай улууһун алын кылаас үөрэнээччилэрин муста. Оҕолор төрүччүлэрин үөрэтэн, хос эбэлэрин, эһэлэрин тутта сылдьыбыт малларын-салларын, таҥастарын-саптарын, иһиттэрин-хомуостарын илдьэ кэлэн, дьоҥҥо-сэргэҕэ иһитиннэрдилэр, кэпсээтилэр. Кыттааччылар үлэлэрин «Чуораанчык», «Колокольчик+» оҕо сурунаалларын үлэһиттэрэ уонна «Саха тыла 400» уопсастыбаннай хамсааһын чилиэнэ Алла Ноговицына сыаналаатылэр.
Ол курдук, түмүк маннык буолла. III истиэпэннээх дьупулуомунан Дьокуускай куорат А.Г. уонна Н.К. Чирээйэптэр ааттарынан национальнай гимназия 4 кылааһын үөрэнээччитэ София Борисова наҕараадаланна. Кини эбэтин 60 саастаах суумкатын, патифону, ийэтэ оҕо сылдьан оонньообут оонньуурдарын, симэхтэрин, көмүстэрин туһунан кэпсээтэ. София ийэтиниин ретро истииллээх таҥас куонкурсугар куруук көхтөөх кытыыны ылаллар. Бүгүн иккиэн ретро былааччыйаларын, симэхтэрин кэтэн дьон биһирэбилин ыллылар.
II истиэпэннээх дьупулуому ылары Дьокуускай куорат А.Г. уонна Н.К. Чирээйэптэр ааттарынан национальнай гимназия 4 кылааһын үөрэнээччитэ Антон Потапов ситистэ. Кини эһэтэ кус, хаас, куобах уҥуохтарыттан оҥорбут оонньууларын туһунан сырдатта. Антон улааттаҕына, эһэтин туйаҕын хатарыан баҕарарын биллэрдэ.
Оттон кыайыылааҕынан Горнай улууһун Маҕарас орто оскуолатын 1 кылааһын үөрэнээччитэ, саамай кырачаан кыттааччы Дуолан Горохов таҕыста. Кини хос эбэтэ тикпит туос иһиттэрин, былыргы харчылаах кумааһынньыгын, иистэнэр саптарын, хос эһэтин эһэни бултуур батаhын, ону таһынан Кытайтан кэлбит хоппону аҕалан, сиһилии кэпсээтэ.
«Дьиэ кэргэним үйэлээх баайа» куонкурс-быыстапка оҕолору эбэ, эһэ тутта сылдьыбыт малын, иһитин-хомуоһун харыстаан, ытык өйдөбүл оҥостон, дьоҥҥо-сэргэҕэ кэпсии, билиһиннэрэ сылдьар, төрүттэрин ытыктыыр үтүө киһи буолалларыгар төһүү күүс буолар.
keskil14.ru