Төрөппүт, аҕа, уол оҕотун тыа сирин үлэтин үөрүйэхтэригэр сыһыара үөрэтэрэ оҕоҕо да, аҕаҕа да икки өттүттэн туһалаах. Уол оҕо техникаҕа сыста үөрэннэҕинэ, сайын от үлэтигэр солбуллубат тракторист, сатабыллаахтык оту холкутук мунньан, рулоннаан таһаарар ньыманы баһылыыр. Биһиэхэ, кырдьаҕас ыалга, Мая Григорьевна, Семен Васильевич Прокопьевтар уоллара, ССРС норуодунай учуутала Михаил Андреевич Алексеев аатын сүгэр өрөспүүбүлүкэтээҕи лицей-интернат тохсус кылааһын ситиһиилээхтик бүтэрбит Володя оппутун рулоннаан биэрэн, үөрүүбүт үрдээн, санаабыт чэпчээн олоробут.
Володя биир дойдулаахпыт Иван Иванович Шамаев директордаах, Дьокуускай куоракка, өрөспүүбүлүкэтээҕи лицей-интернакка 2023-24 үөрэх сылыгар үөрэнэр буолбутун истэн, хайҕыы, үөрэ иһиттибит.
Үөрэнээччилэргэ чиҥ билиини биэрэр үөрэх кыһатыгар үөрэнэн, үрдүк үөрэххэ киирэн, наука киэҥ аартыгын арыйан төрөппүттэрин, бииргэ төрөөбүттэрин,олохтоохтору үөрдэр дьоһуннаах киһи буолуо диэн эрэлбит улахан.
«Оҕо сааһыттан үлэни сыаналыы, дьон кыһалҕатын өйдүү үөрэммит оҕо кэлэр олоҕор чэпчэкитик олорор»,- диэн этиини кытта сөбүлэһэбит. Володяҕа, бу бэргэн этии тиийдин диэн баҕарабыт.
Михайловтар, Ороһу, Үөһээ Бүлүү