— Үтүө күнүнэн! Бүгүн биһиги ыалдьыппыт Бүтүн Аан дойдутааҕы «Азия оҕолоро – 2022» күрэх кыттыылааҕа, ону таһынан элбэх спортивнай күрэхтэр кыттыылаахтара, кыайыылаахтара Диана Федорова. Диана бэйэҕин билиһиннэр эрэ уонна «Азия оҕолоро» күрэххэ кыттыбыккын сырдат эрэ.
— Үтуө күнүнэн! Мин Федорова Дианабын, «Лөгөй лиссиэй-интернат» 10 «б» кылааһын үөрэнээччитэбин. Мин спордунан сөбүлээн дьарыктанабын. Ол курдук, «Азия оҕолоро» күрэххэ 2022 сыллаахха Владивосток куоракка кыттыыны ылбытым.
— Эйиигин спорт умсугутуулаах эйгэтигэр ким сыһыарбытай?
— Мин кыра эрдэхпиттэн сүүрэрбин-көтөрбүн олус сөбүлүүр этим. Ону ийэм Варвара Константиновна таба көрөн сүүрдэр этэ уонна сүүрүү секциятыгар суруттарбыта. Оскуолаҕа киирбитим кэннэ аан бастаан Гаврил Васильевич Игнатьев сүүрүүгэ дьарыктаабыта, элбэх күрэхтэргэ кытыннарбыта. Ол курдук, 6 кылааска улууска күрэхтэһэ сырыттахпына Бэйдиҥэ тренера Андрей Васильевич Федоров таба көрөн бэйэтигэр ыҥырбыта. Онтон ыла ыстаҥа көрүҥэр дьарыктаммытым. Сылга иккитэ Бэйдиҥэҕэ баран сборданарым, кэккэ ситиһиилэрдэммитим. Мин тренерым элбэх оҕону дьарыктаан ыстаҥа көрүҥэр маастар оҥорбута.
— Диана, хас сыллаахтан ыстаҥа спорт көрүҥэр дьарыккын саҕалаабыккыный? Уонна «Азия оҕолоро» кыттаргар сүүмэрдээһини хайдах ааспыккыный?
— Мин сахалыы ыстаҥа (национальные прыжки) көрүҥҥэ 6 кылаастан саҕалааммын утумнаахтык дьарыктаммытым. Бу Бүтүн Аан дойдутааҕы «Азия оҕолоро» күрэххэ 3 сүүмэрдиир түһүмэҕи ааспытым. Ол курдук, бастакы сүүмэрдээһин Нам улууһугар буолбута. Бу күрэххэ бастакы миэстэни ылбытым. Салҕыы иккис сүүмэрдээһин Дьокуускай куоракка буолбута, иккис миэстэ буолбутум. Онтон түмүктүүр күрэх эмиэ Дьокуускай куоракка буолбута. Иккис миэстэ буолан уопсай сүүмэрдээһини ааһан үөрбүтүм уонна «Азия оҕолоро» күрэххэ кыттар чиэһи ылбытым.
— Диана, «Азия оҕолоро» күрэххэ кыттаргар дьарык хайдах уонна ханна ааспытай?
— Бу күрэххэ кыттарга биһиги Казахстаҥҥа уонна Дьокуускай куоракка ый кэриҥэ барыахпытыгар дылы күүстээх дьарыгы ааспыппыт.
— Уонна бутэһик ыйытыым буолар, бу буолаары турар «Азия оҕолоро» курэхтэһиигэ кыттаары сылдьар спортсменнарбытыгар тугу сүбэлиэн этэй?
— Бу буолаары турар «Азия оҕолоро» кыттыылаахтарыгар баҕарабын кытаанах тулууру, үрдүк ситииһиилэри! Бу биир ыйтан ордук хаалбыт бириэмэҕэ биир да сөкүүндэни мээнэ хаалларбакка, бэйэҕит кыттар хайысхаҕытыгар өссө күүскэ дьарыктанан туруоруммут сыалгытын ситиһин!
— Диана, биһиэхэ кэлэн ыалдьыттаабыккар махтанабыт! Салҕыы спорт умсугутуулаах, күүстээх эйгэтигэр бэйэҕин көрдөрөн чахылҕайдык көрдөрөргөр баҕарабыт!
Дарина Петухова, Лөгөй лиссиэй-интернат үөрэнээччитэ.