Игидэй орто оскуолата сылын аайы хайыһар күрэҕин тэрээһиннээхтик , коллектив барыта, нэһилиэк олохтоохторо, оҕолор сүргэлэрэ көтөҕүллэн туран ыытар. Быйыл XXII Манчаары оонньуутун көрсө: Педагогическай үлэ, Саха сирин спордун бэтэрээнэ, СӨ үөрэҕириитин туйгуна, энтузиаст-пропаган-
дист, чэпчэки атлетикаҕа улуус хас да төгүллээх чемпиона, призёра, 40 сыл устата оҕону, ыччаты спортка үөрэппит, уһуйбут педагог, 75 үбүлүөйдээх сылыгар, Константин Петрович Никифоров кубогар, улуустааҕы комплекснай күрэх ыытылынна.
Сааскы чэбдик сарсыарда, эмиэ да тыаллаах күн, алаас иһэ толору дьон-сэргэ тоҕуоруста. Таатта улууһун хайыһардьыт оҕолоро кыраларыттан улаханыгар тиийэ илин-кэлин түсүһэн, күөн көрсүһэ муһуннулар. Хамаандалар ох курдук оҥостубуттар. Музыка тыаһынан доҕуһуоллатан кэлбит дьону итии аһынан аһатаары хорчуопкаһыттар да мустубуттар. Сааскы сибиэһэй салгыҥҥа шашлык да астааччылар бааллар. Кырыа кыһынтан босхоломмут дьон, шашлык амсайар баҕалаах ,сэмээр буһарын кэтэһэллэр.
Бүгүҥҥү тэрээһини сырдатар, Сергей Петрович Ермолаев чуор куолаһа дьону сэргэни түмэ тарта.Парады иилээн саҕалаан киллэрдэ: Хайыһары өрө тутан, көҕүлүү сылдьар энтузиаст тренер, Софрон Егорович Оросин.
Дэбдиргэ хамаандатын оҕолоро хара маҥнайгыттан кылбаа маҥан «Таатта» диэн көстүүмнээх ох курдук оҥостон кэлбиттэрэ киһи хараҕар быраҕыллар. Константин Петровиһы эҕэрдэлии кэллилэр: Улуустааҕы үөрэх управлениетыттан, Иван Иванович Тарабукин, Игидэй нэһилиэгин баһылыга, Егор Алексеевич Марков, оскуола директора, Андрей Александрович Миронов онтон да атын чугас дьонноро.
Тэрээһин иккис чааһынан «Спорт тула кэпсэтии» диэн итии чэйдээх төгүрүк остуол ыытылынна. Остуолу иилээн саҕалаан ыытта: ветеран учуутал, София Семёновна Пахомова. Константин Петрович Иркутскайдааҕы физкультура училищетын бүтэриэҕиттэн сүрүннээн икки оскуолаҕа үлэлээбит. Ол курдук, Игидэй орто оскуолатыгар уонна Баайаҕа орто оскуолатыгар элбэх оҕону спорт эйгэтигэр уһуйбута.
Уһун кэмҥэ спортка бииргэ алтыһан, үлэлээбит доҕоро, Иван Иванович Потапов-Дьохсоҕон нэһилиэгиттэн кэлэн, оччотооҕу кэмнээҕи үлэлэрин ахтан-санаан ааста. Баайаҕа орто оскуолатын директоры иитэр үлэҕэ солбуйааччы, Иван Васильевич Старостин орто оскуола уонна олохтоох дьаһалта аатыттан эҕэрдэ сурук, дьоһун бэлэх туттарда.
«Баайаҕа нэһилиэгин сайдыытыгар кылаатын иһин» анал бэлиэни туттаран сүргэбитин көтөхтө, үөрүүбүтүн үксэттэ. Үөрэнээччилэрэ, Егор Кимович, Любовь Николаевна Захаровтар дьиэ кэргэн учууталларыгар дьоһун бэлэхтэрин туттардылар.
Комплекснай күрэхтэһии кэнниттэн Игидэй орто оскуолатын оҕолоро, Алдаҥҥа хайыһар сборугар баралларынан, Игидэй эр дьоно оҕолорбутун өйөөн ыраахтан, чугастан кыттыһан ботуччу суумманы тренердэригэр Софтон Егорович Оросиҥҥа туттардылар. Оҕолорбут үчүгэйдик дьарыктанан эт-хаан, өй-санаа өттүнэн сайдан кэллинэр диэн алгыс тылбытын аныыбыт.
Бүгүҥҥү күрэх уопсай түмүгэ:
1 м. Игидэй орто оскуолата.
2 м. Тааттатааҕы лицей.
3 м. Туора -Күөл орто оскуолата ылары ситистэ.
Варвара Ефимова,
Игидэй,Таатта.