Алтынньы 29 күнүгэр, РДШ төрүттэммит күнүгэр, Далыр нэһилиэгэр оскуола лидердэригэр аналлаах коммунарскай сбор буолла. Дүллүкү оскуолатыттан 11 оҕо буолан, салайааччыбыт Наталья Матвеевна Степанованы кытта барбыппыт. Күнүс 14:30 араҕан баран, киэһэ 18:30 саҕана тиийбиппит. Далыр оскуолатыгар үөрэ-көтө көрсүбүттэрэ.
Тэрээһиммит киэһэ 8 чаастан саҕаламмыта. Оҥхой, Боотулуу, Дүллүкү, Далыр, Мэйик оскуолатын лидердэрэ мустубуппут. Бастаан хамаандабытын билиһиннэрбиппит, речёвка, девиз эппиппит, флешмоб көрдөрбүппүт. Оскуола остолобуойугар кэлбит оҕолору наһаа минньигэстик аһаппыттара.
Онтон станцияларынан оонньуулар саҕаламмыттара: ырыа ыллаабыппыт, «С днём рождения РДШ!» диэн эркин хаһыатын оҥорбуппут, о.д.а. Түүн үс аҥар чааска дискотека саҕаламмыта, ол кэннэ бары киинэ көрбүппүт.
Уопсай түмүккэ биһиги хамаанда маҥнайгы миэстэни ылан, үөрүүбүт-көтүүбүт өссө үрдээбитэ.
Ол кэннэ төгүрүччү олорон, оҕолор санаа атастаспыттара. Тугу сөбүлээбиттэрин, туох санаалаахтарын. Мин коммунарскай сборга маҥнайгыбын сырыттым. Бары даҕаны олус астынан кэллибит.
Дайаана Гаврильева, IX кылаас, » Эрчим» эдкорпост.
Дүллүкү, Үөһээ Бүлүү.