Талба Таатта – Саха дойдумсах майгытын туллар тутааҕа, сүрэҕин чопчута. Таатта сирэ саха дьонун тардар күүһэ сөҕүмэр. Таатта дьоно 2025 сылга “Манчаары XXII оонньуулара” ситиһиилээхтик тэриллэригэр бука бары туруннулар.
Дьиҥнээх саха киһитин анала – төрөөбүт төрүт сирин иччилээһин, оҕо-уруу тэнитэн, айар сатабылларынан дьаһанан, аймах-билэ дьоҥҥо туһалаах буолуу. Төрөөбүт дойдуга олорортон астыныы, өбүгэ төрүт сирин иччилээһин – бу дьол!
Кулун тутар 29 күнүгэр Тааттатааҕы “Сатабыл” оҕо айымньытын дьиэтигэр тапталлаах Тааттабытыгар XXII-с Манчаары оонньуулара саҕаланаллара 100 хонук хаалбытын бэлиэтиир үтүө күнүгэр аналлаах “Аҕа оҕотунаан” маастар-кылаас ыытылынна. Ытыктыыр Ытык-Күөлбүт тэрилтэлэриттэн өбүгэлэрин төрүт сатабылларын кэнчээри ыччаттарыгар куруутун уһуйа сылдьар бастыҥ дьиэ кэргэттэр аҕалара оҕолорунаан, сиэннэринээн түмсэн Тааттабыт үөт талаҕын эт илиилэринэн тутан-хабан, ойууну-бичиги талахха түһэрэн, быһыытын-таһаатын дьүөрэлээн, илиилэрин сылааһынан истиҥ санааларын иҥэрэн, бары сатабылларын туһанан Дьайааччы курун таҥан оҥордулар. Маастар-кылаас саамай кыра кыттааччыта үс саастаах Исмаил эһэтинээн Иван Федотовичтыын кэлэн талаҕы нырылаан, дьоһумсуйан, тэҥҥэ айар кут абылаҥар кыттыста. Бэйэлэрин төрөөбүт сирдэрин-уоттарын ытыктаан, сатабылларын сайыннарар баҕалаах, Манчаары оонньуларын тэрээһинигэр күүс-көмө буолар сыаллаах биир дойдулаахтарбытыгар Лева, Миша уонна Михаил Петрович Тарасовтарга, Даниил уонна Федор Иванович Павловтарга, Игнат уонна Виктор Семенович Григорьевтарга, Исмаилга уонна Иван Федотович Рахлеевтарга, Афанасий Афанасьевич Варфоломеевка уонна Саша Сидоровка, Даниилга уонна Павел Филиппович Иовлевтарга, Сайаан уонна Станислав Гаврильевич Бубякиннарга дириҥ махталбытын тиэрдэбит.
Тааттатааҕы «Сатабыл» оҕо айымньытын дьиэтин үлэһиттэрэ ыытар үлэлэрин сэргиир, туох-хайдах кыалларынан өйүүр дьоммутугар-сэргэбитигэр куруутун махтанабыт, үтүөнү баҕарабыт!
Кэлэр Манчаары оонньуутугар бэлэмнэнии үлэтигэр дьоһун кылааты киллэрсэр дьон баарыттан астынабыт уонна инникитин даҕаны талыы талба Тааттабыт сайдарыгар, үтүө аата өрөгөйдүү турарыгар тэҥҥэ үлэни-хамнаһы өрө тутуохтара, күүс-көмө буолуохтара диэн эрэнэбит!
Татьяна Васильевна Портнягина, методист
Тааттатааҕы «Сатабыл» оҕо айымньытын дьиэтэ