Олунньу 1 күнүгэр Үөһээ Дьааҥы улууһугар «Бастыҥнар хамсааһыннара» (Движение первых) диэн оҕо уонна ыччат биир сомоҕо хамсааһынын бастакы Форума олус сэргэхтик ыытылынна. Дириҥ историялаах кырдьаҕас Дьааҥы куоратыгар улуус уонтан тахса оскуолатыттан 150-ча тахса оҕо уонна педагог мустан, билсиһэн, бииртэн биир кэрэхcэнэр форматтаах тэрээһиҥҥэ кыттан, бодоруһан, инникитин Бастыҥнар хамсааһыннарыгар көхтөөхтүк, эрчимнээхтик кыттарга күүс-кыах ылан бардылар. Бу форуму улуус хамсааһынын салайааччыта Светлана Васильевна Ноговицына, солбуйааччыта Максим Владимирович Аммосов тэрийдилэр.
Форум сүрүн тэрээһинигэр Боронук оскуолатын үөрэнээччилэрэ уонна учууталлара кытыннылар. Форум чаҕылхай арыллыытын Боронук оҕолоро «Бастыҥнар хамсааһыннарын» ис хоһоонун арыйар үҥкүү-туруорууну (хореограф Луара Юрьевна Заборовская) көрдөрдүлэр. Тымныы тыйыс хоту сиргэ олорор оҕолор ыраас хаарга саҥаны, сырдыгы айар-тутар дьоҕурдаахтарын бу үҥкүү көрдөрдө.
Форум ыҥырыылаах ыалдьыта — улууспут баһылыга Владислав Михайлович Иванов — мустубут оҕолору, учууталлары, төрөппүттэри эҕэрдэлээн тыл эттэ уонна Арассыыйа Бэдэрээссийэтин гражданина буолбуттарын туоһулуур пааспардары туттарда.
Форум биир саамай интэриэһинэй чааһа – оҕолор баһылыктан саамай долгуйар ыйытыыларын ыйыттылар. Владислав Михайлович хас биирдии ыйытыкка толору хоруйдаата. Онон бу кэпсэтии оҕолор улуустарын туһугар олус кыһаллалларын, долгуйалларын көрдөрдө.
Өссө биир долгутуулаах түгэн — Боронук оскуолатын үөрэнээччитин Наина Слепцова уруһуйун быыстапкатын арыйыы буолла.
Наина төрүөҕүттэн инвалид, ол эрэн кини олох ыараханыттан чаҕыйбакка, дьоҕурун сайыннаран, кэрэ эйгэтин айар-тутар, бука барыбытыгар холобур буолар күүстээх санаалаах кыысчаан.
Форумҥа түмсүбүт оҕолор салгыы «Сайдыы үөһүгэр буол» («Будь в движении») квест -оонньууга, маастар кылаастарга кытыннылар.
Уопсайа, 5 араас маастар кылаас ааста. «Чаҕаан» ВИА (сал.Р.Н.Кривошапкин) , үҥкүү студията (сал.Л.Ю.Заборовская), айар мастерской (сал. Е.А.Слепцова, Е.В.Ефимова), медиакиин үлэтэ (сал. Г.Ф.Дабанова, Нь.В.Слепцова) SMM, блогер хайысхатыгар Михаил, Анна Рожиннар, Ай-ти эйгэтэ (сал. Дь.И.Капитонов).
Форум биир куонкурсунан Улуус харыйатын киэргэтэргэ бэйэ илиитинэн оҥоһуллубут харыйа оонньуутун көрүүтэ буолла. Уопсайа 56 оҥоһук киирбититтэн 15 үлэ бастаата. Форуммут чаҕылхай түмүктэниитигэр «Кыһын Саха сириттэн саҕыллар» акциянан лаглайбыт харыйабытын киэргэтэн дьиримнии умайар уотун холбоон, сандаара уматтыбыт.
Маннык умнуллубат кэрэ-бэлиэ тэрээһинҥэ кыттан, оҕолор бары сүөм үрдээн, Бастыҥнар үлэлэрин билсэн, үлэбитин торумнаан тарҕастыбыт. Сылаас чэйдээх, минньигэс астаах Боронук оскуолатын буфета Евдокия Семеновна Бережнова салайыытынан ыалдьыттары барыларын босхо чэйдэттэ-аһатта.
Улахан махталбытын улууспут баһылыгар Владислав Михайлович Ивановка, тэрийээччилэргэ Светлана Васильевна Ноговицынаҕа, урбаанньыт Семен Семенович Аммосовка, Боронук (директор Нина Афанасьевна Потапова) уонна Верхоянскай (директор Галина Феликсовна Дабанова) оскуолаларын учууталларыгар тиэрдэбит.
Ливия ДРУГИНА, Боронук орто оскуолатын 10 кылааһын үөрэнээччитэ,
Үөһээ Дьааңы