Бүгүн Арассыыйаҕа Дьиэ кэргэн, Саха сиригэр Оҕо саас сылларын чэрчитинэн П.А. Ойуунускай аатынан Саха академическай тыйаатырыгар тохсус төгүлүн ыытыллар өрөспүүбүлүкэтээҕи оскуола саастаах оҕолорго аналлаах Н.С. Шишигин аатынан “Дьүрүһүй, хомуһум!” диэн куонкурус ыытыллынна.
Быйыл бу күрэххэ хаһааҥҥытааҕар да элбэх бөлөҕүнэн уонна биирдиилээн толорууга холбоон 3000 оҕо кытта кэлбит. Бу көрдөрүү саха оҕотугар хомуска оонньуур интэриэс үрдээбитин уонна үрдүк таһымнаҕын бэлиэтиир.
Күрэх арыллыытыгар Аан дойду виртуоз хомусчута Спиридон Спиридонович Шишигин хомуска уонна Сөрен Биркен дудукка бииргэ оонньоон кыттааччыларга алыптаах эҕэрдэ нүөмэри бэлэхтээтилэр, оҕолорго ситиһиини баҕардылар.
Быйылгы күрэх кыайыылаахтарыгар бириистэри Саха Өрөспүүбүлүкэтин Правительствотын Председателин солбуйааччыта Сергей Васильевич Местников, М.К. Аммосов аатынан Хотугулуу илиҥҥи федеральнай университет президена Евгения Исаевна Михайлова, Ил түмэн председателин солбуйааччыта Виктор Николаевич Губарев, Саха Өрөспүүбүлүкэтин култуураҕа уонна духуобунай сайдыыга миниистирэ Афанасий Иванович Ноев, Цифровой контент сайдыытын фондатын салайааччыта Афанасий Афанасьевич Саввин, ЯнаАвтоТранс хааччахтаммыт тэрилтэ салайааччыта Альберт Алексеевич Третьяков, Аан дойду виртуоз хомусчута Спиридон Спиридонович Шишигин, Норуоттар икки ардыларынааҕы хомусчуттар түмсүүлэрин салалтатын чилиэнэ, Германияттан ыалдьыт Сөрен Бирке туруорбуттар.
Бүгүҥҥү куонкурска дьүүллүүр сүбэ састааба.
Бөлөҕүнэн толорууга:
- Саха Өрөспүүбүлүкэтин култуураҕа уонна духуобунай сайдыыга миниистирин солбуйааччыта Марина Владимировна Силина
- Аан дойдутааҕы хомус киинин уонна түмэлин директора Дмитрий Дмитриевич Бястинов
- Дьокуускайдааҕы 2с нүөмэрдээх оҕо искусствотын дьиэтин хомуска уһуйааччыта, Саха сирин култууратын туйгуна Евдокия Афанасьевна Семенова
Биирдиилээн толорууга:
- “Аан дойду виртуоз-хомусчута”,Саха Өрөспүүбүлүкэтин үтүөлээх артыыһа, М.Н. Жирков аатынан музыкальнай колледж уһуйааччыта Варвара Александровна Степанова.
- Искусствоведение кандидата, Арктикатааҕы судаарыстыбыннай култуура уонна искусство институтун искусствоведение кафедратын преподавателя Варвара Егоровна Дьяконова
Бу тэрээһин 2016 сылтан тиһигин быспакка, Саха Өрөспүүбүлүкэтин култууратын үтүөлээх үлэһитэ, 2008-2018 сс. Хомус аан дойдутааҕы түмэлин уонна киинин дириэктэринэн үлэлээбит Николай Спиридонович Шишигин кэриэһигэр ыытыллар.