Бу нэдиэлэҕэ оскуолабытыгар улуус кииниттэн ойуур харыстабылын үлэһитэ Еремей Еремеевич Алексеев уонна нэһилиэкпит леснигэ Владимир Михайлович Бочетов ыалдьыттаатылар.I-VI кылаас оҕолоругар ойууру харыстыыр туһунан бэсиэдэ ыыттылар.
Тыа отун-маһын, кыылларын, көтөрдөрүн, сир аһын туһунан көрдөрөн кэпсээтилэр. Ойуурга харыстабыллаахтык сыһыаннаһарга сүбэлээтилэр.
Ойуур өстөөҕө — баһаар. Ойуурга сылдьан, уоту туттууга сэрэхтээх буолуу туһунан быһаардылар. Ойуур умайдаҕына, тыа кыыллара, көтөрдөрө, от-мас, сир аһа суох буоларын бары билэбит.
Оҕолор олус элбэх ыйытыыны биэрдилэр: «Баһаар туохтан буоларый?», «‘Ардах түһэ турдаҕына, баһаар буолуон сөп дуо?», » Оҥхой сиригэр баһаар хантан кэлбитэй?», «Оҕо уоту ыыппыт буоллаҕына, ким ыстарааптанарый?» о.д. а. Саамай элбэҕи IV кылаас үөрэнээччитэ Сайдыына Чомчоева ыйытта уонна бэйэтэ билэрин эмиэ кэпсээтэ.
Бу көрсүһүүттэн ойуур баһаара турбутун анал үлэһиттэр спутниктан «термоточканы» көрөн биллэрэллэрин, оҕо баһаары ыыттаҕына, төрөппүттэрэ мөлүйүөнүнэн суумаҕа (вертолёт, элбэх киһи үлэтин төлөбүрүн киллэрэн) ыстарааптаныахтарын сөбүн, умайбыт ойуур саҥаттан уонунан сылынан биирдэ эрэ үүнэрин, өссө да элбэҕи биллибит.
Оҕолорго ойуурга сылдьыы сүрүн быраабылата: хайаан да улахан дьону кытта сылдьыы уонна уоту оттуо суохтаахтар диэн буолар.
Айыына Петрова, Саша Иванова, VI кылаас. » Эрчим» корпост.
Үөһээ Бүлүү, Дүллүкү.