Cэтинньи 10 күнүгэр Дүллүкү нэһилиэгэр өр күүппүт үөрүүлээх, кэтэһиилээх, устуоруйаҕа киирэр күммүт үүннэ.Сарсыарда 10 чаастан олохтоох дьаһалта дьиэтигэр аптека арылынна.
Аптеканы анал үрдүк үөрэхтээх провизор, оскуолабыт выпускнига Антонина Дмитриевна Симонова (Дярикова) арыйда. Сарсыарда 10 чаастан саҥа тэрилтэни арыйыы үөрүүлээх түгэнигэр нэһилиэк дьоно муһуннулар.
Дүллүкү нэһилиэгин баһылыга Николай Петрович Романов бу тутаах боппуруоспут быһаарыллыбытынан Антонина Дмитриевнаҕа махтанна,нэһилиэгин дьонун эҕэрдэлээтэ. Баар кыһалҕаны өйдөөн, аптека арыллыытын өйөөн дьаһалта дьиэтиттэн биир хос анаан бэриллибитин иһитиннэрдэ. 10 тыһ. суумалаах сертификаты туттарда.
Ветераннар түмсүүлэрин салайааччыта Валентина Ильинична Ксенофонтова эмп атыылыыр пуун аһыллыбытынан ис сүрэҕиттэн эҕэрдэлээтэ. Улуус кииниттэн күһүн, саас суолга хаайтарыы кэмигэр эмп ылларар хас биирдии киһиэхэ кыалла охсубатын, онон элбэх тэрилтэ көҥүлүн ылан сертификаттанан, аптека арыллан, бу тыын боппуруос быһаарыллыбытын эттэ. Ыаллыы Хоро нэһилиэгиттэн Анжелика Ариановна Борбуева кэлэн аптека арыллыбытынан олохтоохтору истиҥник эҕэрдэлээтэ.
Кэлбит дьон наадыйар эмтэрин ылан махтаннылар, дабылыанньа кээмэйдэнэн, өссө бэлэх тутан үөрдүлэр. Бу бэлиэ күн 3-с кылаас үөрэнээччитэ Дамир Стручков битэмиин атыылаһаары кэлбитин көрүстүбүт. Саҥа арыллыбыт эмп тэрилтэтэ нэһилиэнньэ доруобуйата чэгиэн-чэбдик буоларыгар, олоҕо, үлэтэ-хамнаһа бигэ туруктаах буоларыгар биллэр көмөлөөх буолуоҕа.
«Эрчим» медиа киин эдэр кэрэспэдьиэннэрэ,
Дүллүкү, Үөһээ Бүлүү