Дүллүкү нэһилиэгэр баһаарынай чаас 2009 сыллаахха кулун тутар 5 күнүгэр аһыллыбыта. «МПЧ-6» биир тыһыынчаттан тахса киһилээх нэһилиэккэ баһаары утары охсуһар аҕыйах киһилээх чаастары тэрийэр туһунан СР бастакы Президенэ М.Е. Николаев уурааҕар олоҕуран тэриллибитэ.
Ахсынньы 10 күнүгэр баһаарынай чаас саҥа дьиэтин үөрүүлээх арыллыыта буолла. Үөрүүлээх тэрээһиҥҥэ Дьокуускайтан Саха сирин баһаарынай сулууспатын үлэһиттэрэ Р.З. Босиков, Н.А. Павлов, улуус кииниттэн «Үөһээ Бүлүү» МТ баһылыгын солбуйааччы С.А. Михалев, улуус баһаарынай этэрээтин начаалынньыга В.К. Новиков кыттыыны ыллылар. Алгысчыт Т.В. Миронов саҥа дьиэҕэ киирии сиэрин-туомун толордо. Дүллүкүтээҕи «Алгыс» түмсүү үҥкүүнэн, сынньалаҥ, култуура киинин үлэһиттэрэ ырыанан эҕэрдэлээтилэр.
Кэлбит ыалдьыттар саҥа дьиэ арыллыытыгар анаан тыл эттилэр.
Руслан Захарович Босиков, СР баһаары утары госсулууспатын начальнига:
— Дүллүкү нэһилиэгин олохтоохторун, биир идэлээхтэрбин саҥа дьиэҕэ киирбиккитинэн ис сүрэхтэн эҕэрдэлиибин. Новиков В. К. салайааччылаах Үөһээ Бүлүүтээҕи баһаарынай этэрээт улуустарга биир саамай үчүгэй көрдөрүүлээх үлэтинэн биллэр. Дүллүкүгэ олохтоох администрация өйөбүлүнэн, үлэһиттэр бэйэлэрин күүстэринэн, олохтоохтор көмөлөрүнэн икки блоктаах үчүгэй тутуулаах баһаарынай чаас дьиэтэ үлҕэ киирдэ.
Николай Петрович Романов, «Дүллүкү» МТ баһылыга:
— Бүгүн нэһилиэкпитигэр саҥа депо арыллан көмүскэллээх буоллубут, өссө күүһүрдүбүт. Баһаар буолбатын диэн этэн тураммын, улуус дьаһалтатыгар, кэлбит ыалдьыттарбытыгар махталбытын тириэрдэбин. Үлэһиттэр, күүстэринэн, этэрээт, дьаһалта көмөлөһөн, субботник ыытыллан көмөлөөн тутулунна.
Никита Александрович Павлов, СР нэһилиэнньэҕэ куттал суох буолуутун комитетын председателин солбуйааччы:
— Бу бэйэ күүһүнэн, тэрилинэн уонна дьаһалынан саҥа дьиэҕэ киирэн үлэлии олороргут атын улуустарга, нэһилиэктэргэ үтүө холобур буолуон сөп.
Тыл этии кэннэ саҥа дьиэҕэ киирии аалай лиэнтэтин үөрүүлээх быһыыга-майгыга быһыы буолла.
Дьиэни киирэн көрөн-истэн баран, биһиги кэлбит ыалдьыттары кытта кэпсэттибит.
Виктор Константинович Новиков, Үөһээ Бүлүүтээҕи баһаарынай этэрээт начальнига:
— Маннык дьиэ республикаҕа аҕыйах буолуо. Дүллүкү баһаарынайдара ичигэс дьиэҕэ үлэлээн абыраныахтара. Баһаарынай үлэтэ биир геройдуу үлэ буолар. Баһаарга ылбычча киһи киирбэт, умуруорбат. Бу үлэҕэ сылдьар дьоҥҥутун, аҕаларгытын, убайдаргытын өйдүөх тустааххыт. Оҕолор бу быыһыыр идэҕэ үөрэнэ, талаһа сатыахтааххыт.
Тутууга олохтоох МТ уонна улуус администрацията көмөлөстө. Сорох матырыйаала куораттан аҕалылынна. Дүллүкү МПЧ үлэһиттэрэ эппиэтинэстээхтэр, бэрээдэк баар. Кэлиҥҥи кэмҥэ этэҥҥэ баһаар суох. Ол аата сэрэтии үлэтэ сөпкө ыытыллар. Дьоҥҥо-сэргэҕэ баһаартан сэрэхтээх буолуу туһунан иһитиннэрии кэмигэр тириэрдиллэр эбит.
Н.А. Павлов: «Баһаары утары үлэлиир госсулууспа, Быыһыыр сулууспа уонна «Саханефтегазсбыт» тэрилтэ биир кэлимсэ үлэни тэрийэн ыытабыт. Сүрүн сорукпут — дьону быыһааһын»,- диэн кэпсээтэ. Үөрүүлээх түгэҥҥэ мустубут Дүллүкү нэһилиэгин дьоно олус үчүгэйдик көрүстүлэр диэн махталын тириэртэ.
Биһиги быйыл оскуоланы бүтэрэр буоламмыт, Р.З. Босиковтан дьону быыһыыр идэҕэ ханна үөрэниэххэ сөбүн туһунан ыйыталастыбыт. Руслан Захарович: «Үрдүк үөрэх Москваҕа, Санкт-Петербурга Владивостокка уонна ХИФУ-ка баар. Оттон байыас буолуон баҕалаах эдэр дьон эт-хаан, күүс-уох өттүнэн сайдыылаах буолуохтаахтар. Биһиэхэ баһаартан сэрэхтээх буолууга инструктордар, инспектордар бааллар, онно кыргыттар үлэлииллэр. Онно эмиэ анал үөрэх ирдэнэр», — диэн кэпсээтэ.
Афанасьев Александр Александрович, Дүллүкүтээҕи баһаарынай чаас начаалынньыга:
— Мин 2009 с. бу депо аһыллыбытыгар караул начальнигынан үлэлии киирбитим. Онтон 2013 сылтан салайааччынан үлэлиибин. Дүллүкүгэ Егор Алексеевич Николаев баһылыгынан талыллан үлэлии киирбитигэр дьиэбит эргэрэн, аварийнай туруктанан, баһаарынай саҥа дьиэтин тутарга туруорсубуппут. Кини сөбүлэһэн, депутаттар өйөөн, үбэ көрүллүбүтэ. Үлэһиттэр мас кэрдэн, бэйэбит тутарга быһаарыммыппыт. Онтон Егоров Алексеевичтыын сүбэлэһэн, сэндвич панелынан аныгылыы көстүүлээх дьиэни тутарга былааннаабыппыт. Онон бу сыл кулун тутартан үлэбит саҕаламмыта. Сыбаарка үлэтин олохтоох дьон Семенов С.Е., Мандаров К.К. оҥорбуттара. Муус устартан үлэһиттэр бары хомунан-тэринэн тутан барбыппыт. Сайыннары биир күн өрөөбөккө үлэлээбиппит. Күһүн халлаан тымныйыан иннинэ киин ититиигэ холбонон, массыыналарбытын саҥа депоҕа киллэрбиппит. Салгыы ис өттүн оҥостон, ситэрэн үлэлии олоробут. Олохтоох администрация тутуу матырыйаалын булууга, буор кутуутугар, таһыытыгар, техниканан көмөлөспүтэ. Улуус баһылыга В.С. Поскачин өйөөн, эбии харчы көрөн, куораттан тиийбэт матырыйаалбытын эбии аҕалтарбыппыт.
Билигин «МПЧ-6» Дүллүкүтээҕи баһаарынай чааһыгар 10 киһи үлэлиир. Балаҕан ыйыгар иккис «Урал» массыынабыт кэлбитэ. Салгыы үлэлиирбитигэр усулуобуйабыт баар буолла.
Нэһилиэкпит биир тутаах тэрилтэтин үлэтин-хамнаһын, саҥа дьиэҕэ киирбит бэлиэ күннэрин сырдаттыбыт. Саҥалыы тэриммит эппиэттээх үлэлээх баһаарынай чаас үлэһиттэригэр ситиһиилээх үлэни баҕарабыт.
Петя Семенов, Дайаана Федорова, Дүллүкү орто оскуолатын 11 кылааһын үөрэнээччилэрэ, «Эрчим» эдкорпост.