Биһиги оскуолабыт үөрэнээччилэрэ Руфова Илона (IX кылаас), Тобохова Гульнара, Санникова Алина (VIII кылаастар) Өктөмҥө СӨ Наука дьоҕус академиятыгар үөрэнэ, сынньана сылдьаллар. Оҕолорбут номнуо элбэҕи билбиттэр-көрбүттэр. Сонуннара элбэх, маннык диэн кэпсииллэр:
Алина: Үөрэхпит наһаа үчүгэй, элбэх саҥаны биллибит. Холобур, хайдах интервью ыларга, ыстатыйа суруйарга үөрэннибит, видео оҥорору, монтажтыыры, видеону хайдах тутан устары биллибит. Сынньалаҥмыт эмиэ интэриэһинэйдик ааһар. Күҥҥэ биэстэ аһыыбыт, киэһэ аайы баспытааталлар оонньуу, викторина ыыталлар.Сарсыарда туран сэрээккэлиибит, сарсыардааҥы аһылык кэнниттэн үөрэнэбит.
Гульнара: Үчүгэйдик үөрэнэ сылдьабыт. Элбэх саҥаны биллибит. Көмпүүтэргэ үлэлииргэ, интервью ыларга үөрэннибит. Барытын үчүгэйдик кэпсээн, быһааран биэрэллэр. Сынньанар сирбит элбэх, этээс аайы олорор сирдээх, актовай саала, шахматтыыр сир баар. Утаттахха, хас хардыыбыт аайы кулер баар.
Илона: СӨ Наука дьоҕус академиятын «Медиа — ракета» лааҕырыгар 11 оҕо буолан үөрэнэ сылдьабыт. Манна биһигини «Кэскил» оҕо хаһыатын үлэһиттэрэ, устудьуоннар ыстатыйа суруйарга уонна видео монтажтыырга үөрэтэллэр. Эбии туһалаах билии ыларбытыгар медиа хайысхатынан дьарыгырар дьону ыҥыраллар. Наһаа үчүгэй тэриллиилээх дьиэҕэ олоробут. Тэрээһиннэргэ аналлаах киэҥ-куоҥ саалалаахпыт, этээс аайы бириэмэ атаарарга оонньуур, сынньанар сирдээхпит, күҥҥэ биэстэ минньигэстик аһатар остолобуойдаахпыт. Иллэҥ кэммитигэр волейболлуурбутун уонна сынньанар сиргэ олорон кэпсэтэрбитин сөбүлүүбүт. Саҥа оҕолору кытта билсиһэн, алтыһан бииргэ сылдьабыт. Маннык сиргэ үөрэнэ, сынньана кэлбиппиттэн олус астынабын.
Бу курдук оҕолор астына сэһэргээтилэр. Кинилэргэ ситиһиилээх үөрэҕи, үтүө сынньалаҥы баҕарабыт.
Дайаана Гаврильева, IX кылаас, «Эрчим» корпост.
Дүллүкү, Үөһээ Бүлүү.