Олунньу 17 күнүгэр биһиги оскуолабытыгар патриотическай иитии ыйын чэрчитинэн, Аҕа дойдуну көмүскээччи күнүн көрсө «Смотр строя и песни» байыаннай хаамыы күрэҕэ үрдүк таһымнаахтык ыытылынна.
Ол курдук, Россия ис дьыала министиэристибэтин Тааттатааҕы Госавтоинспекция суолга сэрэхтээх буолуу инспектора, полиция лейтенана Анатолий Анатольевич Оросин ыҥырыыбытын ылынан, дьүүллүүр сүбэҕэ үлэлээтэ. Параады РФ үөрэхтээһинин бочуоттаах үлэһитэ, СӨ үөрэҕириитин туйгуна, учууталлар учууталлара, «Уолан» военнай-патриотическай кулууп төрүттээччитэ Митрофан Кузьмич Блахиров салайан ыытта. Кылаастар бары да олус үчүгэйдик бэлэмнэммиттэрин, таҥас-сап, уопсай көстүү олус үчүгэйин Анатолий Оросин бэлиэтээтэ. Оҕолорго куруук маннык бэрээдэктээхтик, суолга эмиэ сэрэхтээхтик сылдьыҥ диэн ыҥырда.
Бу күрэхпит 3 сүһүөҕүнэн арахсан ыытылынна уонна түмүгэ маннык буолла:
Алын сүһүөхтэргэ:
- 1 миэстэ — 1 кылаас хамаандата;
- 2 миэстэ — 3 кылаас хамаандата;
- 3 миэстэ — 2 кылаас хамаандата;
Орто сүһүөхтэргэ:
- 1 миэстэ — 7 кылаас хамаандата;
- 2 миэстэ — 5 кылаас хамаандата;
- 3 миэстэ — 6 кылаас хамаандата;
Улахан сүһүөхтэргэ:
- 1 миэстэ — 9 кылаас хамаандата;
- 2 миэстэ — 10-11 кылаас хамаандата;
- 3 миэстэ — 8 кылаас хамаандата;
Ону тэҥэ дьүүллүүр сүбэ анал ааттары иҥэрдэ:
- «Бастыҥ строевой форма» — 3 уонна 8 кылаас хамаандалара;
- «Бастыҥ хамандыыр» — Игнатьев Артур, 1 кылаас үөрэнээччитэ, Саввин Артур, 9 кылаас үөрэнээччитэ;
Оттон «Муҥутуур кыайыылаах» аатын 4 уонна 9 кылаастар сүктүлэр.
Оҕолору бэлэмнээбит ОБЗР, физкультура учууталлара Юрий Иванович Ивановка, Арыйаан Николаевич Поповка, кылаас салайааччыларыгар, бары кыһамньылаах төрөппүттэрбитигэр, иилээн-саҕалаан ыыппыт тэрийээччилэрбитигэр, чуолаан Россия ис дьыала министиэристибэтин Тааттатааҕы салалтатыгар барҕа махталбытын тиэрдэбит, кыайыылаахтары итиитик-истиҥник эҕэрдэлиибит!
Г.Д. Бястинов-Бэс Дьарааһын аатынан Чымынаайы орто оскуолатын пресс-киинэ,
Таатта улууһа.
keskil14.ru