Таатта улууһун С.Р.Кулачиков-Эллэй аатынан Чычымах орто оскуолатын үөрэнээччилэрэ Дайаана Чурукова (X кылаас), Октя Аввакумова (VIII кылаас) иллэҥ кэми туһалаахтык атаараллар.
Оҕолор сахалыы олбоҕу тигиинэн дьарыктаналлар. Илии үлэтэ буолан, тигэргэ бириэмэ барар. Кыргыттар үлэлэрин туһунан билиһиннэрэллэр.
Дайаана Чурукова:
– Үлэбитин “Мой начальный бизнес” бырайыак чэрчитинэн саҕалаабыппыт. Аан маҥнай үлэ уруогар тигэргэ үөрэммиппит. Учууталбыт Ольга Константиновна араас ньымалары, туһалаах сүбэлэри, албастары көрдөрбүтэ. Атыылыырга реклама суруйан, биллэриибитин тарҕапыппыт. Уопсайа холбоон, 8 олбоҕу тигэн, түөрдүн 400 cолкуобайга атыылаабыппыт, иккитин бэлэх биэрбиппит.
Онон аҕыйах да буоллар, матырыйаал атыылаһан, үлэбитин салҕыыр харчыланныбыт (1600 солк). Бу бырайыагы инникитин үлэлэтэр, кэҥэтэр былааннаахпыт. Олбох тигиитэ олус сыралаах, уустук үлэ. Пандемия буолбатаҕа буоллар, өссө үлэлиэхпит, атыылыахпыт этэ.
Онон оҕо кыра эрдэҕиттэн тугу эмэ оҥорору сатыыр буоллаҕына, кини ону харчыга туруоран, эбии дохуот киллэриэн, суотабай харчытын уо.д.а. атын ороскуоттарын төлөнүөн сөп. Бэйэ оҥорбута туохтааҕар да күндү. Бэйэ оҥоһуу – кимиэхэ да суох, майгыннаабат күндү бэлэх уонна дьиэ кэргэн бүддьүөтүн хаҥатарга көмө буолар.
Октя Аввакумова:
– Дойду үрдүнэн билигин — уустук кэм. Таатта улууһун дьоно баар ирдэбили кытаанахтык тутуһар. Бу кэмҥэ таах быар куустан дьиэҕэ олорбокко, иистэнэбин. Саҥа үөрэх дьылыгар хайдах кыалларынан үлэбитин салгыахпыт диэн эрэл баар.
Ааптар: Павел Ильин