«Сэрэтии — ол аата сэбилэниилээх!» диэн баһаартан сэрэхтээх буолууга сетевой добровольческай этэрээт бырайыага. Бу бырайыак сыала-соруга: үөрэнээччи төрөөбүт дойдутун экологическай кыһалҕаларыгар болҕомто ууруу, баһаартан сэрэхтээх буолууга үөрэтии, ойууру харыстыыр кыаҕы үөскэтии.
Бырайыак Мэҥэ Хаҥалас улууһун Е.Д. Кычкина аатынан Матта орто оскуолатын «Ларикс» оскуола лесничествотын көҕүлээһининэн олоххо киирбитэ, салайааччы Гоголева Сардана Петровна. Уонна кыттыыны ылбыппыт Таатта улууһун С.Р. Кулачиков-Эллэй аатынан Чычымах орто оскуолатын 9 кылааһын үөрэнээччилэрэ, салайааччыларбыт Иванова Дария Егоровна, Малышева Аграфена Порфирьевна, Уус Алдан улууһун Бэйдиҥэ орто оскуолатыттан оҕолор уонна салайааччылара Стручкова Любовь Павловна, Дягтерев Мичил Николаевич.
Учууталларбыт кылаас чааһын ыыппыттара, баһаарга сэрэхтээх буолуу туһунан кэпсээбиттэрэ. Онтон биһиги тэрилтэлэринэн сылдьан баһаартан сэрэхтээх буоларга кэпсээбиппит уонна буклет түҥэппиппит. Харбалаахтааҕы баһаарынай депоттан Ючюгяев Иннокентий Семенович кэлэн лекция аахпыта, огнетушителинэн хайдах туттары көрдөрөн, быһааран биэрбитэ.
Сетевой оскуолалар ортолоругар бастыҥ агитационнай плакат уруһуйугар куонкурус буолбута, онно көхтөөхтүк кыттыбыппыт.
Бырайыак кыттыылаахтарыгар баһаартан куттал суох буолуутун сэрэтэр видеоконференция буолбута. Онно ВДПО старшай инструктора Полятинская Д.А. олус интэриэһинэй кэпсэтии ыыппыта.
Былырыын олус элбэх баһаардар буолбуттара. Ордук тыа умайбыта. Мин наһаа харыһыйбытым. Күөх мастарбыт биһиги тыынар салгыммытын оҥорон таһаарар буоллахтара.
Аны мастарбыт өлбүттэрин суотугар ууну оборбот буолан сир ньуура уларыйан, ирбэт тоҥ буорбут ууллар кутталы үөскэтэр. Онон киһи барыта тыынар тыыннааҕы харыстыыр туһугар, уоттан сэрэхтээх уонна эппиэтинэстээх буолуохтаах.
Бу бырайыакка үлэлээммит үгүһү биллибит, олохпутугар туһаныахпыт дии саныыбын.
Амгана ХАПТАГАЕВА, 9 кылаас үөрэнээччитэ,
Таатта, Чычымах.
