Сэтинньи 1-12 куннэригэр СӨ Наука аччыгый академията тэрийэн ыытар «КиноМАНиЯ» үөрэх бырагырааммата Хаҥалас улууһун Өктөм нэһилиэгэр буола турар.
Мэҥэ Хаҥалас улууһун Чыамайыкы оскуолатын 9 кылааһын үөрэнээччилэрэ Антон Захаров уонна мин, Максимов Алгыстан, киинэ устааһыҥҥа үөрэнэ сылдьабыт. Манна барыта Саха сирин араас улуустарыттан 68 оҕо үөрэнэ, дьарыктана сылдьар. Оҕолору барыбытын хас да бөлөххө, оператордарга, режиссердарга, сценаристарга, монтажердарга, артыыстарга араартаабыттара. 5 күн үөрэннибит.
Мин оператор буолбутум. Биһигини хайдах устарга, ханнык ракурстан устар ордугун, уоту туһаныыга үөрэттилэр. Антон артыыска үөрэммитэ. Үөрэхпит бырагыраамматыгар СӨ биллиилээх киинэ режиссера Михаил Лукачевскай, «Сахафильм» режиссера Эдуард Новиков, сценариһа Любовь Борисова кэлэн үгүһү кэпсээн, үөрэтэн, сценарийдарын көрдөрөн барбыттара. Олус интэриэһинэй көрсүһүүлэр, лекциялар, маастар-кылаастар буоллулар.
Видео-zoom нөҥүө Калининград оҕолорун кытта сценарий суруйарга үөрэммиппит. Үөрэхпит кэнниттэн, хаалбыт күннэргэ киинэ уста сылдьабыт. 7 хамаандаҕа арахсан тэттик киинэлэри уста сылдьабыт. Мин оператор, Антон артыыс буолан холонон көрөбүт. Үөрэхпит бүтэһик күнүгэр киинэлэрбитин «КиноМАНиЯ» бэстибээлигэр сүрэхтиэхтээхпит.
Алгыстан Максимов, 9 кылаас, «Проба пера» эдэр кэрэспэдьиэнэ, Чыамайыкы, Мэҥэ Хаҥалас