Муус устар 6-7 күнүгэр Чыамайыкы нэһилиэгэр «INFINITY» диэн устудьуоннар этэрээттэрэ кэлэ сырыттылар. Кинилэр араас үөрэхтэртэн мустан кэлбиттэр.
Бастаан 5-11 кылаас оҕолоругар профориентационнай үлэ ыыттылар. Ол курдук педагогическай, медицинскэй, финансово-экономическай, индустриально-педагогическай, юридическай уонна култуура колледжтарын, технологическай техникум уонна естественнай наука институтун туһунан кэпсээтилэр. Устудьуоннар кэпсээбиттэрин кэнниттэн, режиссер, оператор Иван Никифоров бэйэтин үлэтин туһунан уонна киинэ хайдах уһулларын кэпсээтэ.
Онтон спортивнай площадка хаарын ыраастааһына буолбута, сорохтор ыалларга мас хайыппыттара.
Киэһээ студеннар кэнсиэр ыыппыттара. Үҥкүү, ырыа, күлүүлээх сценка арааһын көрдөрбүттэрэ. Кэнсиэри олус сэҥээрдим. Ол кэннэ ыччакка көрдөөх-нардаах дискотека буолбута.
Сарсыныгар 5-11 кылаас оҕолоро уонна ыччат волейбол оонньоотубут, араас маассабай оонньуулар ыытыллыбыттара.
Оҕолор бары көхтөөхтүк кытыннылар, дуоһуйдулар, элбэҕи биллилэр, сорохтор ким ханнык үөрэххэ киириэхтэрин баҕаралларын быһаарыннылар. Кэлбит устудьуоннарга улахан махтал!
Азиза Копырина, Х кылаас, «Проба пера» медиа-киин