Тиһэх чуораан диэн хас биирдии оскуоланы бүтэрэр оҕоҕо ордук суолталаах, долгутуулаах күн буолар. Бу күн сайыҥҥы сынньалаҥ саҕаланыытын уонна үөрэх түмүктэнэрин бэлиэтиир.
Ыам ыйын 22 күнүгэр А.И.Федотов аатын сүгэр спорт уораҕайыгар үөрүүлээх тэрээһин ааста. Саала «Алые Паруса» айымньы тематикатынан киэргэтиллибит. Онно учууталлар, оскуола оҕолоро, кинилэр төрөппүттэрэ уонна ыалдьыттар мустаннар бэрт сэргэх тэрээһин буолан ааста.
Быйыл биһиги оскуолабытын 40 оҕо бүтэрдэ. Выпускниктарга анаан оскуолабыт директора Надежда Васильевна Уарова, улуус баһылыга Степан Анатольевич Саргыдаев уо.д. а. эҕэрдэлэрин эттилэр, алгыс тылларын анаатылар. Оскуоланы бүтэрээччилэр бииргэ түмсэн, көрөөччүлэргэ кэрэ көстүүлээх, умнуллубат үҥкүүлэри бэлэхтээтилэр. Бары үҥкүүнү сэргээн көрдүлэр, сөхтулэр. Араас таһымнаах наҕыраадалар, бириэмийэлэр туттарыллыннылар. Ол курдук бары таптыыр “Кэскил” хаһыаппыт махтал суругун медиа оскуола выпускниктара Маша Филиппова, Толя Яковлев туттулар. Түгэнинэн туһанан бары наҕыраадаламмыт оҕолору ис сүрэхпиттэн эҕэрдэлиибин.
Онтон үөрэхтэригэр, спортка, общественнай олоххо ситиһиилээх оҕолор тиһэх чуорааны тыаһатар чиэскэ тигистилэр. Чуораан чугдаарбытыгар киһи саҥата аҕайаата. Лыҥкынас тыас намыраабытын кэннэ,саала ытыс тыаһынан туолла.
Оскуолаҕа атаарбыт дьоллоох 11 сыллара кэннигэр хааллаҕа. Үөрэх бүтэрээччилэргэ иннилэригэр бүтүн аан дойду арылынна. Билигин кинилэр олох диэн “муора” устунан кыһыл баарыстаах суудунанан инники диэки, саҥа түһүмэххэ устан бардылар. Онтон атаарааччылар алҕыы, батыһа көрөн хааллыбыт.
Лида Борисова,
С.А. Новгородов аатынан Чурапчы орто оскуолатын 10 гуманитарнай кылаас үөрэнээччитэ