Биһиги төрөөбүт Чурапчыбыт күн ахсын үүнэр-сайдар. Араас саҥа тутуу бөҕө барда. Муус устар 13 күнүгэр биһиги кылааһынан саҥа тутуллубут культурнай-спортивнай комплекска экскурсияҕа сырыттыбыт.
Төрөппүттэрбит эрдэ кэпсэтэн, уруоктар кэннилэриттэн тута тиийдибит. Бу саҥа тутуу Афанасий Кирикович Софронов аатын сүгэр.
Ийэбиттэн ыйыталаһан билбитим, Афанасий Кирикович Чурапчыга спорт сайдыытыгар улахан оруоллаах киһи буолар эбит. Саҥа КСК улахан да улахан саалалаах, хас гардеробнайыгар душтардаах, барыта киэҥ-куоҥ, аныгылыы оҥоһуулаах.
Иккис этээскэ тренажернай зал баар, онно киирэн баҕалаах дьон эрчиллэллэр эбит. Биһиги барытын боруобалаан көрөн наһаа астынныбыт. Киһи доруобуйатын көрүнүөхтээх, кыра буоллун, улахан буоллун. Онно анаан бэртээхэй сынньанар, дьарыктанар сирдэммиппит диэн олус үөрэн тарҕастыбыт.
Артем Седалищев, 5 в кылааһын үөрэнээччитэ,
С.А. Новгородов аатынан Чурапчы орто оскуола.