Олунньу 17 күнүгэр Чурапчы улууһугар А.И. Федотов аатынан спорт уораҕайыгар пионерскай хамсааһын төрүттэммитэ 100 сылыгар аналлаах үөрүүлээх линейка буолла. Улууспут 21 оскуолатыттан 21 этэрээт кэлэн кыттыыны ыллылар. Сэбиэскэй Сойуус саҕанааҕы дружина сборун реконструкциятын көрдөрдүлэр. Этэрээттэр бары былаахтаах, маршировкалаан киирэн сбору саҕалаатылар. Дружина знамятын киллэрии туһунан долгутуулаах түгэн эбит. Кэлбит ыалдьыттары, кыттааччылары улууспут аҕа баһылыга Степан Анатольевич Саргыдаев, үөрэх управлениетын салайааччыта Юрий Павлович Посельскай эҕэрдэ тыл эттилэр. Урукку кэмнэргэ пионер баһаатайынан үлэлии сылдьыбыт дьоҥҥо наҕараада туттардылар.
Линейка иккис чааһыгар урукку кэмнээҕи пионерскай хамсааһын туһунан сырдатар роликтары оскуола барыта темаларынан үллэстэн оҥобуттарын көрдөрдүлэр. Ол курдук тимуровскай үлэ, макулатура хомуйуута, үөрэхтэригэр мөлтөх оҕолорго көмө, үлэ лааҕырдара уо.д.а. интэриэһинэй роликтары көрдүбүт.
С.А.Флегонтов аатынан оскуола оҕолоро “Пионердар Аҕа Дойду сэриитин кэмигэр” композиция, С.А. Новгородов аатынан Чурапчы орто оскуолатын үөрэнээччилэрэ аныгы оҕо хамсааһына “Орлята России” композиция туруоран көрдөрбүттэрин дьон сэҥээрдэ.
Сайаана РОЖИНА: ОЛУС ДОЛГУЙДУМ
«МФСК саалатыгар улахан таһымнаах, өрө күүрүүлээх, интэриэһинэй тэрээһин ыытыллынна. Буолан ааспыт бырааһанньыкка сылдьан олус элбэҕи биллим. Олуһун догуйдум, дуоһуйдум. Кэлэр көлүөнэ эбэлэрбит, эһэлэрбит, ийэлэрбит, аҕаларбыт историяларын билэрбит олус наадалаах дии саныыбын.
Пионер диэн тыл ол кэминээҕи оҕоҕо элбэҕи этэр суолталаах. Аныгы оҕолор пионер диэн кимин билбэттэр. Бүгүн бу сборга сылдьан баран дьэ өйдөөтүм диэххэ сөп. Пионер диэн, бастатан туран, эппиэтинэс. Бэйэҕэр уонна тулалыыр эйгэҕэ, үөрэххэ, табаарыстаргар. Чиэһинэй буолуу, эппит тылга турааһын, улахан дьоҥҥо убаастабыллаах сыһыан. Бу барыта баар буолуохтаах хас биирдии оҕоҕо.
Урукку сылларга пионер баһаатайдарынан үлэлээбиттэри бүгүҥҥү тэрээһиҥҥэ чиэстээтилэр, олус долгутуулаах, хас биирдии кэлбит ветеран учууталлар, баһаатайдар ол кэмнэри санаан уадыйан ыллыллар. Биһиги кинилэргэ доруобуйаны, уһун олоҕу баҕарабыт. Сборга оскуола оҕолоро кыттыбыттара олус киэргэттэ, оҕолор бары урукку кэм пионердарын курдук хаалтыс баанан, пилотка кэтэн тэринэн кэлбиттэр. Знамя таһаарыытыгар музыкальнай оскуола оҕолоро горн, барабан тыаһатан долгутуулаах түгэни эбии күүһүрдэн биэрдилэр».
Пионердар тустарынан роликтары, композициялары көрөн элбэҕи өйдөөтүбүт. Бу дьаһалы тэрийбит тэрийээччилэргэ улахан махталбытын тиэрдэбит, биһиги эдэр көлүөнэҕэ тиийимтиэ, олус долгутуулаах сбору ыыппыттарыгар.
Түмүккэ уопсай хаартыскаҕа түһүү буолла. Маннык тэрээһиннэр буолаллара олус үчүгэй. Биһиги, аныгы үйэ оҕолоро хайаан да дойдубут историятын билэрбит наада дии саныыбын.
Арианна Макарова, Сайаана Рожина, 10 кылаас,
С.А.Новгородов аатынан Чурапчы орто оскуолата