Муус устар 14-24 күннэригэр, С.А. Новгородов аатынан Чурапчы орто оскуолатын 8-с педагогическай кылааһыттан төрдүө буолан «Сосновый бор» лааҕырга сынньанан, сайдан, билиибитин хаҥатан кэллибит.
Манна оскуолабыт администрацията уонна М.К. Аммосов аатынан ХИФУ пединститута дуогабар түһэрсэн ыҥырыллан сырыттыбыт. Биһиэхэ бу сменаҕа баһаатай буоларга билии биэрдилэр, үөрэттилэр. Попова Күннэй, Логинова Милена, Пестерева Сандаара уонна мин – Сивцева Кэскилээнэ баран саҥа сатабыл бөҕө ылан кэллибит. Лааҕырга уопсайа 5 этэрээт баарыттан биһиги 2-с этэрээккэ киирбиппит. Баһаатайбыт Неустроев Степан Степанович буолбута. Лааҕыр доруобуйаны чөлүгэр түһэрэр хайысхалаах буолан, сарсыардаттан араас процедуралары ааһарбыт. Ол курдук кислороднай коктейль иһэртэн саҕалаан араас чэбдигирдэр процедуралары ыллыбыт.
Буфет аһа олус минньигэс, күҥҥэ 5 аһаталлар. ХИФУ устудьуоннара кэлэн араас лиэксийэлэри, оонньуулары, маастар-кылаастары ыытаннар, бириэмэбит олох биллибэккэ ааста. Киэһээтин баһаатайдарбыт «Огонек» диэн тэрээһини ыыталлар этэ. Онно ким күнүн хайдах атаарбытын, туох саҥаны билбитин, тугу ордук сөбүлээбитин эбэтэр сөбүлээбэтэҕин үллэстэҕин. Маннык тэрээһиннэр киһи бэйэтин санаатын аһаҕастык этэригэр үөрэтэллэр диэн толкуйдаатым. Лааҕырга сылдьан, «Лена» кинотетрга баран киинэ көрбүппүт. Лааҕырбыт смената бүтэр түгэнэ кэлбитигэр бары да кыратык хомойон ылбыппыт. Арахсыахпытын олох баҕарбатахпыт. Түмүктүүр тэрээһиҥҥэ флешмоб үҥкүүлээн, оонньоон, дискотекалаан бириэмэбитин олус үчүгэйдик атаарбыппыт. Биһиги лааҕырга баран үгүс саҥа билии ылбыппытыгар оскуолабыт администрациятыгар, кылааспыт салайааччытыгар Любовь Константиновнаҕа уонна ХИФУ пединститутун үлэһиттэригэр махтанабыт. Саҥа билсиһии, саҥа доҕоттор – олус дьоллоох 10 күн ааста.
Сивцева Кэскилээнэ,
8-с гуманитарнай (педагогическай) кылаас үөрэнээччитэ