Быйыл саха суругунан уус-уран литературатын 125 сыла. Чурапчы Арыылааҕын дьоно-сэргэтэ нэһилиэктэрин баай култууратын, устуоруйатын сүрэхтэригэр-быардарыгар, эттэригэр-хааннарыгар иҥэринэ сылдьаллар. Ама, саха литературатын олохтообут улуу Өксөкүлээх сылдьан, үлэлээн-хамсаан, суолун-ииһин хаалларбыт дойдутугар олорон, бу дьоһун даатаны тумнуохпут дуо?
Ахсынньы 12 күнүгэр биһиэхэ литературнай десант ыалдьыттаата. Ол курдук, киэҥник биллибит аныгы кэм суруйааччылара Зинаида Архипова, Ангелина Васильева-Дайыына, Утум Захаров, cаха норуодунай поэтын аатын ылыаҕын ылбыт Саргылана Гольдерова-Саргы Куо кэлэн оҕолору кытта көрсүһэн бэрт сэргэх күнү атаардыбыт.
Норуодунай суруйааччы Сэмэн Тумат алгыстаах тылын видеоҕа устан ыытта. Кини биһиги нэһилиэкпитигэр кэлэр баҕатын биллэрдэ, оҕолорго үтүө сүбэлэрин тиэртэ. Суруйааччылар Эргэ Сурт алааска тиийэн Өксөкүлээх Өлөксөй туруорбут сэргэтигэр сырыттылар, бу былыр буолан ааспыт түгэн киэҥ далааһыннах устуоруйатын оскуола дириэктэрэ Егор Германович Егоров сырдаппытын олуһун сэргээтилэр.
Оскуола оҕолоро суруйааччылар айымньыларын аахтылар, ырыттылар, кинилэр тус олохторун, айар үлэлэрин туһунан ыйытыылары биэрдилэр. Оттон айар эйгэ бэлиэ дьоно оскуола бибилэтиэкэтигэр дьоһун-мааны бэлэхтэрин — кинигэлэри туттардылар.
Бу курдук олус сонун, сэргэх, кэскиллээх көрсүһүүлэр биһиэхэ инникитин да буолуохтара диэн бигэ эрэллээх, көрсүһүү үгүс сырдыгы, кэрэни бэлэхтээбитин билинэн үөрэ-көтө күндү ыалдьыттарбытын атаардыбыт.
Т.М. Каженкин аатынан Арыылаах орто оскуолата, Чурапчы улууһа.
keskil14.ru