Игидэй орто оскуолатын оҕолоро тэйиччиттэн олорон үөрэнии кэмигэр блогерствоны баһылыыллар. Кыралаан видео устан, монтажтаан, YouTube канаалга таһаараллар. «Чуораанчыктыын доҕордос, Кэскиллиин кэккэлэс» бырайыак ааптара Варвара Константиновна Ефимова бу хамсааһыны көҕүлээтэ. Бүгүн Влада Жулева уонна Айаал Матаннанов үлэлэрин эһиги дьүүлгүтүгэр таһаарабыт.
Игидэй оҕолоро төрөппүттэрин кытта оҥорбут видеороликтара билиҥҥи дьиэҕэ олорон үөрэнии кэмин биллэ сэргэхситтилэр. Жулева Влада — 6-с кылаас үөрэнээччитэ. Ийэтинээн маай бырааһынньыгын көрсө торт астааһыныгар сүбэ биэриэхтэрэ.
Влада үөрэҕин таһынан сүрдээх элбэх дьарыктаах: ыт сувенирдарын мунньуаттан саҕалаан үҥкүүгэ, хомуска тиийэ эбии дьарыктардаах. Дьиэ кыылларын ыты, куосканы таптыыр, бэйэтэ иитэр. «Дьиэрэҥкэй » үҥкүү ансамбылыгар, «Хомус алыба» хомусчуттар ансаамбылларыгар дьарыктанар.
Ийэтэ Александра Семеновна олохтоох дьаһалтаҕа специалиһынан үлэлиир. «Чуораанчыктыын доҕордос», «Кэскиллиин кэккэлэс» бырайыагы нэһилиэк иһигэр сүрүннээччилэртэн биирдэстэрэ. Кини чопчу тэрээһининэн, нэһилиэк депутаттарын көмөлөрүнэн сыл аҥаара сурутууга элбэх оҕо дьиэтигэр «Чуораанчык» сурунаал, «Кэскил» хаһыат киирэрэ ситиһиллибитэ.
Оттон бу Матаннанов Айаал ийэтинээн Дария Терентьевналыын балыктааһын туһунан олус интэриэһинэйдик уһулбут видеосюжета.
Айаал сөбүлүүр оонньуура — «Лего», пласталинынан роботтары оҥорор. Айаал билиигэ-көрүүгэ олус тардыһар, энциклопедияны интэриэһиргээн ааҕар. Велосипед тэбэрин туохтааҕар да ордорор.
Бэйэ инф.
1
Олус үчүгэй видеороликтар.Оҕолорго үрдүктэн үрдүк ситиһиилэри баҕарабын.