Таатта Игидэйигэр Варвара Константиновна Ефимова «Чуораанчыктыын доҕордос, Кэскиллиин кэккэлэс» диэн бырайыагын чэрчитинэн оҕолору аны сахалыы блогерствоҕа түмэ тарта. Бу кэскиллээх дьыалаҕа чурапчылар кыттыһыахтара. Бүгүн «Өбүгэ үгэһэ» диэн уруок чэрчитинэн таба иитиитин туһунан бэртээхэй ролигы Никитина Сардаана оҥорбутун эһиги дьүүлгүтүгэр таһаарабыт.
Саха оҕолоро үксүлэрэ өбүгэ төрүт дьарыктарын быһыытынан ынах, сылгы иитиитин эрэ билэллэр. Оттон Игидэй орто оскуолатын 2-с кылааһын үөрэнээччитэ Сардаана Никитина ийэтэ Муоматтан төрүттээх буолан, таба иитиитин курдук Саха сирин биир тутаах дьарыгын этинэн-хаанынан билбит дьоллоох.
Кини ааспыкка саха сылгытын туһунан видеоролик таһаарбыта. Билигин ийэтиниин Сайааналыын ийэтэ төрөөбүт дойдутун Муома улууһун Улахан Чыыстай нэһилиэгин туһунан олус интэриэһинэй матырыйаал бэлэмнээтилэр.
Сардаана үөрэҕэр туйгун. Уруок тас өттүнэн «Чуораанчыктыын доҕордос» бырайыакка дьаныардаахтык дьарыктанна. Олус үчүгэй кэпсиир дьоҕурдаах.
Бэйэ инф.