Олус сэргэх тэрээһин Одьулуун нэһилиэгэр кулун тутар 3 күнүгэр ыытылынна. Бырайыак автора –Э.К.Пекарскай аатынан Игидэй орто оскуолатын саха тылын уонна литературатын учуутала Ефимова Варвара Константиновна. Бырайыак быйыл төрдүс сылын тахсыылаахтык үлэлиир. Внеурочнай деятельностан саҕалаан, нэһилиэк администрациятыгар кииннэнэн, бүтүн нэһилиэги уонна дьиэ кэргэни кытта биир ситимҥэ үлэлээн кэллибит.
Бастаан «Чуораанчыктыын доҕордос» диэн «Чуораанчык» сурунаал редакторын Жиркова Татьяна Ильиничнаны кытта саҕалаабыппыт. Быйыл кэҥээн Игидэй орто оскуолатын директора Дягилев И.И. ,бырайыак автора Ефимова В.К. уонна сэттис кылаастан «Сайдам» хаһыат суруналыыс оҕолоро: Варламова Аня, Иванова Марианна, Петрова Дайаана ыаллыы сытар Чурапчы улууһун Одьулуун нэһилиэгэр үлэлээн кэллибит.
Программа быһыытынан сарсыарда 9 чаастан Одьулуун оскуолатыгар тиийдибит. Дьокуускай куораттан Н.Е.Мординов — Амма Аччыгыйын аатынан «Кэскил» оҕо бэчээтин кыһата тэбис тэҥҥэ баар буолла.
Оскуола директора Афанасий Петрович Максимов коллективын кытта ааҥҥа үөрэ-көтө көрүстүлэр. Сүрдээх үчүгэй тулалыыр эйгэ үөскээтэ. Нэһилиэк баһылыга Людмила Васильевна Ефремова бэйэтинэн кэлэн тэрээһини иилээн-саҕалаан, ыалдьыттары көрсөн былааннаспыта, нэһилиэк уонна оскуола олох биир тыынынан тыына олороллорун бэлиэтэ.
Одьулуун орто оскуолатын администрацията уонна нэһилиэк администрацията куолаан ааҕыы эйгэтигэр ылыстылар. Бэйэлэринэн көҕүлээн элбэх оҕолоох ыалга «Кэскил», «Юность Севера» хаһыаты суруйтардылар.
Бу күн күүстээх үлэ былаан быһыытынан аттарыллан барда. «Күнчээн» уһуйааҥҥа сырыттыбыт. Уһуйаан сэбиэдиссэйэ Старостина Татьяна Васильевна үлэ хаамыытын билиһиннэрдэ. Сахалыы сиэринэн саламааттаах алаадьынан ыалдьыттары күндүлээтилэр.
Уһуйаан иитээччилэрэ: Ефимова Анна Семеновна, Карпова Сардаана Ивановна олус сэргэх, үчүгэй дьарыгы көрдөрдүлэр. Оҕолор билиилэрэ киэҥэ, иитээччилэр сатабыллара үрдүгэ сөхтөрдө.
Салгыы оҕолорго остуол оонньуута олус көхтөөхтүк ыытылынна. Коллекционердар выставкалара, о.д.а сонун үлэлэр выставкаҕа турбуттара кэрэхсэнэр. Оҕолор бары кыра чуораан тутан туран «Чуораанчык× гимнын толордулар.
Төрөппүттэри кытта региональнай таһымнаах төгүрүк остуол ыытылынна. Кыттыыны ыллылар: «Кэскил», «Юность Севера» хаһыат, «Чуораанчык» сурунаал редакцията. Игидэй орто оскуолата (Таатта), А.Е.Мординов аатынан Тааттатааҕы Лицей, Төлөйтөн»Кустук» уһуйаан, Уус -Алдан Кэптэнититтэн уһуйаан, Одьулуунтан «Күнчээн» уһуйаан, орто оскуола, нэһилиэк администрациятыттан, нэһилиэк төрөппүттэрэ.
Нэһилиэк баһылыга Ефремова Людмила Васильевна уонна Н.Е.Мординов -Амма Аччыгыйын аатынан «Кэскил» оҕо бэчээтин кыһатын директоры солбуйааччы Коврова Сардана Егоровна икки өттүттэн салгыы үлэлэһэргэ сөбүлэн түһэристилэр. Ол курдук, бэс ыйын 1 күнүгэр оҕо көмүскэлин күнүгэр оҕо ыһыаҕа ыытыллара былааннанар.
Лоп курдук программа быһыытынан тэрээһиммитин түмүктээн, үөрэн-көтөн тарҕастыбыт.
Ефимова Варвара Константиновна «Чуораанчыктыын доҕордос» бырайыак автора.