Саха төрүт дьарыга баарын тухары саха омук быһыытынан сайдар, кэҥиир, тэнийэр. Тыа ыала былыр-былыргыттан аһыыр аһын бэйэтэ булунар, үлэлээн хаһаанар. Онуоха үлэҕэ, сиэргэ-туомҥа ыччатын бэйэтэ сирдиир, үөрэтэр, билиини-көрүүнү иҥэрэр. Таатта Игидэйигэр оҕолор тэйиччиттэн олорон үөрэнэр кэмнэригэр саҥа сатабыллары баһылыыллар.
Таатта улууһун Игидэй орто оскуолатын учуутала Варвара Ефимова «Чуораанчыктыын доҕордос» бырайыагынан үлэлээбитэ төрдүс сыла буолла. Кини «Чуораанчык» сурунаал редакциятын кытта оҕолорго ыһыах ыһар үтүө үгэһи олохтообут киһи буолар. Эһиил бу Оҕо аймах күүтүүлээх ыһыаҕа 5-с үбүлүөйүнэй сыла буолар. Варвара Константиновна Таатта уонна Чурапчы улуустары биир ситимҥэ үлэлэтэр.
— «Өбүгэ үгэһин үөрэҕин» предмет быһыытынан оҕо кыра сааһыттан өйдөтөр үөрүйэх баар буоларыгар итэҕэйэбит. Бастатан туран ити тэлгэһэттэн саҕаланар. Ол аата сүөһүгэ сыстаҕас буоларыгар олук ууруу. Бу ыраахтан олорон үөрэнии кэмигэр теорияны кытта практиканы дьүөрэлии тутан үөрэтии көдьүүстээх буолар. Маныаха оҕо бэйэтин сатабылынан, туох эрэ саҥаҕа үөрэнэн, тугу эрэ тутан-хабан оҥорорун ситиһиллэр, — диир кини.
Бүгүн кини үөрэтэр оҕолорун үлэлэрин билиһиннэрэбит. Бу 2-с кылаас үөрэнээччитэ Сардаана Никитина төрөппүтүн кытта оҥорбут бэртээхэй видеоролига. Кини манна саха сылгытын туһунан кэпсиир.
Оттон бу Айсаара Захарова «Мин айылҕа оҕотобун» диэн видеоролига.
Бу Иванов Андрей төрөппүттэрин кытта оҥорбут тэттик видеоролигар сахалар сүөһүнү саастарынан хайдах арааралларын туһунан кэпсиир.
Күндү төрөппүттэр! Эһиги оҕолоргутугар бу үтүө үгэһи хайдах иҥэрэҕитий? Санааҕытын суруйуҥ, үлэҕэ сыстаҕас ыччаттаргытын видеоҕа устан атыттарга холобур буолуҥ!
Бэйэ инф.