Чэгиэн-чэбдик, бөҕө турук диэн тугуй? Ол туһунан «Чуораанчык» сурунаал олунньу ыйынааҕы нүөмэригэр ааҕыаххайыҥ.
Екатерина Чехордуна «Үрүҥ күн» диэн остуоруйатыгар Кыырай Тииҥчээн Аламай Күнү кытта олус да истиҥник сэһэргэһэр. Эчи, тииҥчээн өйө-мэйиитэ сытыыта, чобуота ааҕааччыларбытын, бука, сэҥээрдэр буолуохтаах.
Мэҥэ Хаҥалас улууһун Н.Д. Неустроев аатынан Бэдьимэ орто скуолатын 5-с кылааһын үөрэнээччитэ, биһиги сурунаалбытын туппутунан улааппыт Айысхаана Плюк бэлэмнээбит физминуткатын сэргээҥ, туһаныҥ. Чурапчы улууһун Хатылытааҕы «Ньургуһун» оҕо сайдар киинин иитээччитэ Наталья Егоровна Драгунова хоһоон тылларынан ойуулаах оонньуу массааһы билиһиннэрэр. Хатыылаах мээчик эти-сиини чэбдигирдэр!
«Дьиэ кэргэним үйэлээх баайа» бырайыакка Баатара орто оскуолатын 1 кылааһын үөрэнээччитэ Айсана Тарасова эһээтин Егор Самсонович Тастыгин – Дьөгүөссэ туһунан кэпсиир. «Аар тайҕа «профессора» диэн аатынан биллибит булчут үлэни, чэбдик өйү-санааны тутуһан олорон ааспыт. Чэгиэн киһи үлэни хайдах курдук кыайа тутарын туһунан оҕолоргутугар, сиэннэргитигэр холобур гынан кэпсээҥ!
Планета биир саамай бастыҥ сүүрүүгэ «Чаҕылҕан» киһи Усейн Болт тоҕо спордунан дьарыктаммытай? Ол туһунан Дьокуускай куорат 17 №-дээх оскуолатын 9-ус кылааһы үөрэнээччитэ Айхал Матвеев кэпсиир. Түмүккэ ааптар «тот киһи туойбат» диэн саха бэргэн этиитин Усейн Болт олоҕор туох сыһыаннааҕын туһунан толкуйдатар. Санааларгытын күүтэбит.
Кыһыҥҥы кэмҥэ, спорт, хайыһар, хаҥкы тиэмэлэригэр аналлаах сурааһыннары оҥоруу, кырааскалааһын, фигураларынан хартыыналары силимнээн оҥоруу – бу барыта биир нүөмэргэ баар!
Салгыҥҥа сылдьар, таһырдьа оонньуур тоҕо нааданый? Оҕо бэйэтэ көрөн ылынан өйдүүрүгэр анаммыт былакаат дьиэ кэргэн аайы баар буоллун!
Пекиҥҥэ ыытылла турар Олимпийскай оонньуулары баттаһа «Спорт тула түмсэбит» диэн квест-оонньуу сорудахтарын хайаатар даҕаны оҥорооруҥ. Ааптар – физкультура учуутала Сергей Шадрин.
Оҕо саадыгар, оскуолаҕа хааһыны тоҕо сиибитий? Күүс-уох эбинээри, битэмиин иҥэринээри! Хааһы араастарын туһунан хоһоону оҕолоргутун кытта бииргэ ааҕыҥ. Куйаар-код нөҥүө Дьокуускайдааҕы 21 №-дээх «Кэнчээри» оҕону сайыннарар киин иитиллээччитэ Валера Устинов ааҕарын истиҥ.
Кыырпах диэн ааттаах дьикти ыт туһунан Иза Романова («Ньургуһун» оҕо саада, Баайаҕа, Таатта) кэпсээнин оҕолоргутун кытта ааҕаарыҥ. Психологтар Наталья Никифорова, Нюргуяна Александрова ыты иитии улахан эппиэтинэс буоларын туһунан комикс киэбинэн, оҕо тылынан бэрт судургутук кэпсииллэр.
Федор Гуляев «Дьикти оҕо» кэпсээнигэр Кэнчээри саҥа убайа Силип уолу тоҕо атаҕастыырый?
Бу нүөмэргэ өссө бырааттыы эһэлэр сөбүлүүр дьарыктарын, аататрын-суолларын быһаарар уустуга суох эрээри толкуйдатар сорудах баар.
«Водоканал» тэрилтэ идэлэрин туһунан эмиэ нүөмэргэ билсиэххит.
Санааҥ көрүҥ, биир киһи сылга 500 киилэ бөҕү быраҕар! Ол аата айылҕаҕа киһи-аймах оҥорор хорумньута үгүс. Ону хайдах туоратар, аччатар туһунан эко-Кулунчук кэпсиирин көтүтүмэҥ. Аар Ийэ айылҕабытын харыстыыр кыах биһиэхэ баар!
Ааҕыы сылыгар ханнык саҥа, сонун кинигэлэри ааҕыахха сөбүй? 1, 2, 3, 4 кылаас үөрэнээччилэригэр анаан наардаммыт кинигэлэр испиэһэктэрэ бу эрэ нүөмэргэ баар! Ону кытта «Мин дьиэтээҕи бибилэтиэкэм» диэн бэрт сонун, сэргэх саҥа куонкурус саҕаланар! Сиһилии 89142897100 нүөмэртэн билсиҥ.
Сурунаал бастакы сирэйигэр бэчээттэммит худуоһунньук Алина Емельянова, Бэдьимэ орто оскуолатын үөрэнээччитэ Катя Андреева 10-ус кылааска үөрэнэ сылдьан уруһуйдаабыт ойууларын «саҥардыыга» Любовь Гаврильевна Семенова кыыһынан Нарияналыын (2 №-дээх оскуола, Дьокуускай), Сунтаар улууһун Туойдааҕыттан Юлияна Кудряшова (4 «В» кылаас) көмөлөстүлэр.
Оттон сурунаалбыт ойууларын худуоһунньуктар Алина Емельянова, Маргарита Яковлева, Дайаана Калининская, Прокопий Федоров, Алена Арсентьева, Анна Иванова, Сайыына Макарова сүрэхтэрин сылааһын анаан айан-тутан таһаардылар.
Сүрэх, санаа сылааһынан оҥоһуллан, бүөбэйдэнэн тахсыбыт «Чуораанчык» 2-с нүөмэрин ааҕыҥ, сэргээҥ, туһаныҥ!
Бэлэмнээтэ Сардаана МАТВЕЕВА.
«Чуораанчык» оҕо сурунаалын олунньу ыйынааҕы нүөмэригэр көмөлөспүт үтүө доҕотторбутугар анаммыт туоһу суруктары мантан хачайдаан ыл:
