“Чуораанчык”, “Колокольчик” 35 сылларыгар саҥа дьоруойданнылар.
Анна Иванова, худуоһунньук, Татьяна Чирикова, редактор:
Чуораанчык бастакы геройун уобараһын Данил Соловьев уонна Владимир Фролов оҥорбуттара Идиэйэтэ В.Фролов киэнэ этэ. “Колокольчик” сурунаал бастакы нүөмэрин бастакы сирэйигэр уол бэргэһэтин кытыытыгар чуорааннардаах. Бастакы кэлэктиип сүбэтинэн бу герой араас норуоттары хабар суолталаах уонна остуоруйаттан түһэн кэлбит буолуохтаах диэн оҥоһуллубут. “Колокольчик” сурунаал бастакы худуоһунньуга бэйэтин улахан убайын прототибын уруһуйдаабыт.
Ол эрээри кэлин бириэмэҕэ оҕо көрүүтэ, геройу ылыныыта эмиэ уларыйда. Онон биһиги иннибитигэр геройбутун аныгы оҕоҕо чугас гына оҥоруу соруга турбута. Худуоһунньуктар хамаандалара бастакы эскизтэри оҥорбуттара.
Улахан үлэ оҥоһуллубута. Оҕолортон ыйытынньык ыытыллыбыта, элбэх уруһуйдары көрбүппүт. Кинилэргэ быдан чугас герой хайдах буолуохтааҕын туһунан санааларын истибиппит, барытын учуоттаабыппыт. Биһиги геройбут остуоруйа оҕотуттан дьиҥнээх олоххо чугас куорат оҕото, ол эрээри сайын аайы дэриэбинэҕэ эбэлээх эһэтигэр сайылыы барар. Түмүгэр маннык уол буолан таҕыста.
Вера Петрова