Оҕону кыратыттан бэйэтин көрүнэр гына иитэр төрөппүккэ эрэ абыраллаах буолбатах, бэйэтигэр эмиэ туһалаах.
Валя оннук оҕо: быыкаайык эрдэҕиттэн самостоятельнай. Ол иһин хаһан да “Уруоккун оҥордуҥ дуо?”, “Бүгүн репетициялааххын умнума” диэн санатыылар киниэхэ туһуламматтар. Бэйэтэ барытын билэн, аттаран сылдьар, оҥорор дьоһун киһи.
Кырдьыга да, биир күҥҥэ кини сылдьара, оҥороро үгүс. Сарсыарда өттүгэр Валя Михайлова, иккис смена буолан, куруһуоктарыгар сылдьар. Эрдэ туран, чаас кэриҥэ айаннаан, Дьокуускайга киирэн, Саха театрын “Күн оҕолоро” устуудьуйатыгар дьарыктанар. Манна даҕатан эттэххэ, бу Саҥа дьыл иннинэ “Академия талантов” өрөспүүбүлүкэтээҕи күрэххэ “Лучшая актриса” диэн ааты ылбыта. Эбиэттэн киэһэ Марха орто оскуолатын VII кылааһыгар үөрэнэр. Маҥнайгы кылаастан наар “5” сыанаҕа.
Сытыы-хотуу, чобуо кыыс хоһоон ааҕыытын куонкурустарыгар өрүү миэстэлэһэр. Холобура, Ойуунускай төрөөбүтэ 125 сылыгар анаммыт куораттааҕы күрэххэ бастаабыт. Аны туран, үчүгэйдик саҥарар буолан, “Саха” телевидениетин “14club” биэриитигэр эдэр кэрэспэдьиэн быһыытынан үлэлэһэр.
Көнө дьылыгыр уҥуохтаах Валя алын сүһүөх кылаастарга “Айыы Куо” модельнай агентствоҕа уһуйуллубут буолан, кыраһыабайдык туттар-хаптар, балет үҥкүүһүтүн курдук чоруун көрүҥнээх. Ол эрээри балерина буолар баҕа санаата туолбатах. Хойутаан туттарса тиийэ сылдьыбыт. Иккис кылаастан ылалларын билбэккэ хаалбыт. Ол оннугар “Пульс” үҥкүү ансаамбылыгар хаһыс да сылын дьарыктанар, онно бастыҥ үҥкүүһүттэрэ.
Былырыыҥҥыттан ыла “Модель ООН” (Модель Организации Объединённых Наций — это синтез научной конференции и ролевой игры, в ходе которого студенты и учащиеся старших классов на нескольких официальных языках ООН воспроизводят работу органов этой Организации, приобретают дипломатические, лидерские, ораторские и языковые навыки и умение приходить к компромиссу.-Википедия) диэҥҥэ сылдьан, дипломаттыы сыһыаны хайдах олохтуурга, тус санааны сатаан тиэрдэргэ, бэйэ көрүүтүн туруорсарга, биир тылы буларга, хамаанданан үлэлииргэ, политикаҕа дьайарга, дьон ылынар курдук саҥарарга үөрэнэ сылдьар. Бу ООН куруһуогун чэрчитинэн өрөспүүбүлүкэ, Россия, норуоттар икки ардыларынааҕы кэмпириэнсийэлэргэ кыттар. Таатта Чөркөөҕөр “Политолог” лааҕырга сылдьыбыта. Ол хайысхатынан бу күһүн Екатеринбург куоракка баран үөрэннэ. Онно араатардар күрэхтэригэр, Россия араас куораттарыттан кэлбит оҕолору кыайан, 1 миэстэ буолбут.
Барыга дэгиттэр кыыс Валя Михайлова бириэмэтин халтайга таах бараабат. Ол иһин барытын ситиһэр, саҥа үрдэллэри дабайар. Үөрэҕиттэн, уһуйааннарыттан соло булан, бырааттарыгар кекс, бэчиэнньэ астаан күндүлүүр, ийэтигэр уҥа илиитэ, көмөлөһөөччүтэ.
Оскуолатын аатын элбэхтэ көмүскээбит көхтөөх, чаҕылхай үөрэнээччигэ ситиһиини баҕарабыт!
А.Иевлева.