Балаҕан ыйын 17 күнүгэр А.С.Шахурдин аатынан биирдиилээн биридимиэттэри дириҥэтэн үөрэтэр Төҥүлү орто оскуолатыгар үгэскэ кубулуйбут «Уйгуград-2024» күһүҥҥү киэҥ эгэлгэлээх тэрээһин буолан ааста.
Тэрээһиҥҥэ кылаас барыта, төрөппүттүүн оҕолуун, улаханныын кыралыын көхтөөх кыттыыны ыллылар. Оҕолор атыы-тутуу дьаарбаҥкатыгар, оҕуруот аһыттан дьэрэкээн оҥоһуктар, косплей күрэхтэригэр, эҕэрдэ нүөмэрдэргэ бэйэлэрин талааннарын, дьоҕурдарын көрдөрдүлэр.
Тэрээһин сүрдээх сэргэхтик ааспытыттан, оҕолор олус үчүгэйдик бэлэмнэммиттэриттэн, хас биирдии киһи бу түгэҥҥэ кыттыгастаах буолбутуттан астынныбыт. Өссө да инникитин бу үгэс буолбут тэрээһиммит сайда, бэйэтин тула өссө элбэх дьону тарда, угуйа турдун диэн баҕа санаалаахпын.
Төрөппүттэрбитигэр, учууталларбытыгар, салайааччыларбытыгар махталбыт муҥура суох.
Анна СТЕПАНОВА, IX кылаас,
Төҥүлү, Мэҥэ Хаҥалас