Сэтинни 12 күнүгэр Харбалаахтааҕы үөрэхтээһин холбоһугар Тааттатааҕы «Тускул» психолого-педагогическай, медико-социальнай киин специалистара Александра Прудецкая салайааччылаах кэлэн төрөппүттэргэ, учууталларга, кылаас сайааччыларыгар доруобуйаларынан хааччахтаах уонна инбэлиит оҕолорго сыһыанннаах иитии-үөрэтии боппуруостарыгар бэсиэдэ оҥордулар. Төрөппүттэргэ, учууталларга хас биирдиилэригэр туһулаан консультация ыыттылар, сүбэ-ама биэрдилэр, боппуруостарыгар эппиэттээтилэр.
«Тускул» социальнай педагога Прудецкая А.В. манна баар психолого-педагогическай, медико-социальнай киин ОВЗ-лаах оҕолор туруктарын доруобуйаларын бөҕөргөтөргө усулуобуйа тэриллибитин, көмө оҥороллорун, хаһан баҕарар оҕо төрөппүтүнээн кэлэн өйөбүл ылалларын сиһилии кэпсээтэ, кииҥҥэ кэлэллэригэр ыҥырда. Прудецкая А.В.: «Сорох төрөппүттэр сыыһа өйдөөннөр ОВЗ-лаах оҕо сайдыытын сүрүн эппиэтинэһин барытын оскуолаҕа сөҥнүүллэр, оскуола оҥоруохтаах дииллэр. Дьиҥэр, ОВЗ-лаах оҕо сайдыытыгар сүрүн эппиэтинэс — төрөппүккэ, оҕо төрөппүтүн үтүктэр, ордук ылынар, төрөппүтүгэр чугас. Оскуола — төрөппүккэ, оҕоҕо көмө эрэ буолар…», — диэн тоһоҕолоон бэлиэтээтэ.
З.П. Охлопкова Таатта улууһун ТПМПК территориальнай бэрэссэдээтэлэ бу комиссия үлэтин туһунан билиһинэрдэ. 9-11 кылаас ОВЗ-лаах оҕолоро ОГЭ, ЕГЭ хайдах туттарар быраабылаларын уонна усулуобуйаларын билиһинэрдэ. ФГОС ирдэбилинэн үөрэх тэрилтэтигэр ОВЗ-лаах оҕолорго дефектолог, логопед специалистар эбэһээт баар буолаллара ирдэнэрин иһитиннэрдэ.
Е.Г. Собакина логопед уонна Л.В. Тистяхова психолог этэллэринэн билиҥҥи кэмҥэ үгүс төрөппүт оҕотугар болҕомто уурара аччаата. Иллэҥ кэмҥэ төрөппүттүүн, оҕолуун үксүлэрэ телефон тутан баран олороллор, иллэҥ бириэмэлэрин тус туһунан атаараллар. Төрөппүт уонна оҕо икки ардыгар алтыһыы, бэйэ-бэйэҕэ болҕомто ууруу аччыыр, сибээстэһии, кэпсэтии, арааһы ырытыһыы суоҕун кэриэтэ буолар. Ол иһин оҕо саҥарар саҥата сайдыбат, тулалыыр эйгэни кытта алтыһыыта аччыыр, бэйэтигэр бүк түһэр. Ол барыта оҕо эргиччи сайдыытыгар улахан мэһэйи үөскэтэр. Төрөппүт оҕотун кытта өрүү бары боппуруоска алтыстаҕына, быһаарстаҕына, өйдөстөҕүнэ, болҕомто уурдаҕына оҕо толору чөл туруктаах, өйдөөх-санаалаах, бэйэтин санаатын толору этэ буола улаатар.
В.В. Макарова, директоры иитэр үлэҕэ слобуйааччы.
keskil14.ru