Олунньу 28 күнүгэр «Уруйдуубут улуу Кыайыыны!» улуустааҕы бэстибээл чэрчитинэн, И.П. Готовцев аатынан история уонна архитектура түмэлигэр «Улуу Кыайыынан кынаттанан» быыстапка арыллыыта буолан ааста. Бу тэрээһин Улуу Кыайыы 80 сылыгар, Арассыыйаҕа Аҕа дойдуну, Саха Өрөспүүбүлүкэтигэр Ийэ дойдуну көмүскээччилэр сылларыгар ананна.
Быыстапка арыллыыта нэһилиэкпит баһылыга Савва Иванович Егоров эҕэрдэ тылыттан саҕаланна. Улуу Кыайыыны уһансыбыт, олохторун толук уурбут биир дойдулаахтарбыт тустарынан Танда орто оскуолатын 6-с кылааһын үөрэнээччитэ Дьулуур Неустроев кэпсээтэ. Онтон “Ийэлэр өлбөт үйэлээх хорсун быһыылара” диэн бырайыагы, биир балаҕантан 6 киһи Аҕа дойду Улуу сэриитигэр барбыттарын туһунан Танда орто оскуолатын 8-с кылааһын үөрэнээччитэ Ринат Ларионов сырдатта.
Түмэл үлэһитэ Матрена Петровна Черноградская экспонаттары, саллаат медальонун туһунан кэпсээтэ. Бу медальону муус устар 7 күнүгэр 1990 сыллаахха булбуттар. Иннокентий Матвеевич Готовцев медальона буолара дакаастаммыта.
Ити курдук «Улуу Кыайыынан кынаттанан» быыстапка Аҕа дойду Улуу сэриитэ биһиги нэһилиэкпитин кытта быстыбат ситимнээҕин кэпсиир сэдэх экспонаттардаах.
Быыстапка туһунан Туйаара Мамонтова видеотун манна көрүҥ https://t.me/keskil_media2020/15778 https://vk.com/wall-199463452_26861
Снежанна ГОТОВЦЕВА, VIII кылаас, «Байаҕантай кэскиллэрэ» юнкор пост,
М.Н. Готовцев аатынан Танда орто оскуолата, Уус Алдан