Тохсунньу 27 күнүгэр улуус төрүттэммитэ 95 сылынан Үөһээ Дьааҥы улууһун спорт кэрэспэдьиэнэ, коллекционер Платон Егорович Эверстов спорт тиэмэтигэр сыһыаннаах мэтээллэрин, значоктарын, уруучукаларын, кинигэлэрин коллекциятын аҕалан көрдөрдө.


Оҕолор, учууталлар бары сэҥээрэн көрдүбүт, тугу интэриэһиргээбиппитин көрөн, ыйытан билэн хааллыбыт. «Азия Оҕолоро» спортивнай оонньуулар мэтээллэрэ коллекцияҕа 2004 сылтан ыла бааллар. Улаханныын кыралыын бары саамай интэриэһиргээн 2016 сылга Рио куоракка буолбут XXXI Олимпиада мэтээлин көрдүбүт. Эчи, кыраһыабайын.Биһиги мэтээллэри тыытан-хабан көрдүбүт. Сорох мэтээл ыйааһына чэпчэки, сорох мэтээл наһаа ыарахан. Мэтээллэри саамай Күндэл Горохов инэтэриэһиргээтэ. Түөһүгэр кэтэн көрдө. Онуоха учуутала: «Спордунан дьарыктаннаххына, эн бэйэҥ маннык мэтээллэри кэтиэҥ»-диэбитэ.


Нэһилиэк дьонугар-сэргэтигэр интэриэһинэй быыстапкалары көрдөрөллөрө олус үчүгэй. Оҕолор, биһиги, араас хабааннаах, таһымнаах спорт кинигэлэрин, уруучукаларын, мэтээллэрин чугастан көрөн, тыытан астынныбыт. Хас биирдии коллекцияҕа спорт историята түмүллэн сыттаҕа! Платон Егоровичка махталбытын тиэрдэбит. Өссө да маннык тэрээһиннэр буола туруохтара диэн кэтэһэбит.
Нарыйа Иннокентьева,
X кылаас,
Боронук орто оскуолата,
Дьааҥы